Գազի գինը կձևավորվի բանակցությունների արդյունքում. նախարարը չգաղտնազերծեց հայկական կողմի ակնկալած գինը

30 տոկոսով  գազի գնի իջեցման հնարավորության մասին հայտարարությունները էներգետիկ ենթակառուցվածքների ու բնական պաշարների նախարարի պաշտոնակատար Գարեգին Բաղրամյանը ոչ պրոֆեսիոնալ է համարում, քանի որ դա, ըստ նրա, կախված է, թե ներմուծման ինչ գին կունենանք:

Նախարարը լրագրողների հետ զրույցում ասաց, որ «այս պահին ռուսական կողմի հետ բանակցություններ են ընթանում, տեղեկանքների տեսքով բոլոր փաստաթղթերը ներկայացված են,  Սանկտ Պետերբուրգում բոլոր հարցադրումները բարձրացվելու են»: Թե ինչ գին է ակնկալում հայկական կողմը, նախարարը նշեց. «Բանակցությունների արդյունքում կձևավորվի, մի քիչ սպասեք»:

Անդրադառնալով «Գազպրոմ»-ի` վնասով աշխատելուն, ինչից և կախված է գազի գինը, Գարեգին Բաղրամյանն ասաց,  որ պետք է ուսումնասիրվեն ընդհանուր գնագոյացման խնդիրները: «Կարծում եմ, որ ներքին գնագոյացման հարցում լինում են խնդիրներ, որոնք նվազեցնելու տեղ կա»,- շեշտեց նա:

Դիտարկմանը՝ ԱՄՆ-ի պատժամիջոցներն Իրանի նկատմամբ չե՞ն ազդի գազ-էլեկտրաէներգիա հայ-իրանական պայմանավորվածության  վրա,  Բաղրամյանը վստահեցրեց՝ ոչ: «Մենք հանդիպել ենք պետդեպարտամենտի աշխատակիցների հետ, քննարկել ենք խնդիրը, ներկայացրել, որ այդ պրոյեկտը ենթադրում է  շուրջ 1 մլրդ դոլարի ներդրում ՝ էլեկտրահաղորդման գծեր, ջերմակայանի կառուցում, և այդ ներդրումների վերադարձն ապահովվում է նաև գազ-էլեկտրաէներգիա գործարքի շրջանակում: Նրանք էլ դա ընդունում են: Որևիցե խնդիր չունենք այդ մասով, ինչպես կա, այնպես էլ շարունակվելու է»,- նշեց նախարարի պաշտոնակատարը:

Նա տեղեկացրեց նաև, որ «Բարձրավոլտ էլեկտրական ցանցեր» ՓԲԸ-ում 150-160 աշխատակից է կրճատվելու: «Պաշտոնանկություններ, կառուցվածքային փոփոխություններ բոլոր ընկերություններում լինում են: Այս պահին ամենաակտիվ աշխատանքները «Բարձրավոլտ էլեկտրական ցանցերում» են տեղի ունենում: Արդեն նոր տնօրեն է ընտրվել, շուտով նաև հաստիքացուցակը կներկայացնենք, նախատեսվում է շուրջ 150-160 աշխատակցի կրճատում, որոնք, կարելի է ասել, այդքան էլ զբաղված չէին բարձրավոլտ էլեկտրական ցանցերի հիմնական գործունեությամբ»,- մանրամասնեց Բաղրամյանը:

Նախարարի պաշտոնակատարը նաև ընդգծեց, որ, հաստիքային աշխատակիցներին զուգահեռ, կա նաև արտահաստիքային 90 պայմանագրային աշխատող: «Ուղղակի անհասկանալի է` եթե կան հաստիքային աշխատակիցներ, ինչո՞ւ ենք արտահաստիքային 90 աշխատակից պահվում»,- նշեց նա: