Դեռ նախորդ տարվանից ՀՀ մատակարարվող գազի կալորիականությունը ավելացել է. Փաշինյանը պարզաբանում է՝ ինչու է բարձրանում գազի գինը

ՀՀ կառավարության նիստում վարչապետ Նիկոլ Փաշինյանն անդրադարձավ բնական գազի գնի փոփոխության հարցին: Նա ներկայացրեց այդ ուղղությամբ իրականացվող քաղաքականությունը: 

«Տեղի է ունեցել կալորիականության հաշվարկ գազի գնի մեջ: Մի նրբության մասին եմ ցանկանում տեղեկացնել: Դեռ նախորդ տարվանից Հայաստան մատակարարվող գազի կալորիականությունը փոխվել է, այսինքն՝ ավելացել է: Հայաստանում նախորդ մեկ տարվա ընթացքում սպառված նույն խմ գազի դիմաց ավելի մեծ կալորիա է ստացվել: Ջերմատվությունն, ըստ էության ավելացել է: Գիտեք, որ Եվրոպայում 1000 խմ գազի գինը հասել է 2400 դոլարի: Այս իրավիճակում շուկայի նկատմամբ զգայունությունն ավելանում է: Մենք միջոցներ ենք ձեռնարկել Հայաստանի գազի գինը 1000 խմ գազի դիմաց 165 դոլար պահպանելու համար: Այստեղ ավելացել է կալորիականության գործակից: Ասեմ, որ այն շուրջ 100 հազար անապահով ընտանիքների համար չի հաշվարկվում: Որոշակի փոխհատուցում ենք տալիս սահմանամերձ գյուղերի բնակիչներին»,- «Արմենպրես»-ի հաղորդմամբ՝ ասաց Նիկոլ Փաշինյանը:

Հանրային ծառայությունները կարգավորող հանձնաժողովի նախագահ Գարեգին Բաղրամյանը նշեց, որ կալորիականության խնդիրը դեռ եղել է 2013 թվականից: Արդեն իսկ եղել է կալորիայով ճշգրտման բանաձև: 

«Քանի որ կային կուտակված բազմաթիվ խնդիրներ «Գազպրոմ» ընկերության հետ, այդ կալորիայի ճշգրտման բանաձևն անընդհատ հետաձգվել է: Իր տրամաբանական հանգուցալուծմանն է հասել արդեն 2022 թվականին, որովհետև կառավարության հետ բոլոր կնճռոտ հարցերի հետ կապված աշխատանքներն ավարտին ենք հասցնում: Լուծվում է առաջիկա 10 տարիների համար 165 դոլար սահմանին գազի գինը պահպանելու խնդիրը: Արդեն իսկ տրամաբանական է, որ սակագները հաշվարկվեն կալորիայի ճշգրտմամբ, որովհետև այդ հարցը միշտ հետաձգվում էր»,- ասաց Գարեգին Բաղրամյանը:

Ամփոփելով ելույթները՝ ՀՀ վարչապետը նշեց, որ հիմնական նպատակն է գազի մատակարարման ոլորտում հարաբերությունները կարգավորել ինստիտուցիոնալ ձևով: