«Եվրատեսիլ-2014»-ի ինտրիգներից մեկի հանգուցալուծումն` այսօր

Հայաստանի Հանրային հեռուստաընկերությունը տեղեկացնում է, որ այսօր կհանգուցալուծվի «Եվրատեսիլ-2014» մրցույթի ամենահետաքրքիր ինտրիգներից մեկը` հայտնի կդառնա այն երգը, որով Արամ MP3-ին կներկայանա միջազգային երաժշտական հանրությանը: Մրցույթի հայաստանյան երգի եւ տեսահոլովակի պրեմիերան կկայանա այսօր` ժամը 22-ին, Առաջին ալիքի եթերում:

«Եվրատեսիլ»-ի պաշտոնական կայքին տված հարցազրույցում Արամ MP3-ին նշել էր` երգը բնորոշող 3 բառերն են՝ «պայքարի´ր հանուն սիրո»:

Հիշեցնենք, որ մրցույթի հայաստանյան գեղարվեստական խումբը ստացել էր հայ եւ օտարազգի կոմպոզիտորների ավելի քան 75 երգ: «Եվրատեսիլ» մեկնող երգի վերջնական ընտրությունը կատարվել է մի քանի փուլերից բաղկացած լսումների, մանրամասն ուսումնասիրությունների եւ մասնագիտական focus group-ի արդյունքում: Հաշվի են առնվել համաշխարհային արդի երաժշտական տենդենցները, հայաստանյան պատվիրակ Արամ MP3-ի ձայնային տվյալներն ու երաժշտական ճաշակը:

Մրցույթի կիսաեզրափակիչ փուլն այս տարի կկայանա մայիսի 6-ին եւ 8-ին, իսկ եզրափակիչը` մայիսի 10-ին: