Որոտանի կապիտալը մոտ 90 մլն դոլարով ավելի շատ է, քան այն գինը, որով ընկերությունը վաճառվեց

«Որոտանի ՀԷԿՀ»-ի ` ֆինանսական վիճակի մասին վերջին հաշվետվությունից ակնհայտ երեւում է` ընկերության սեփական կապիտալի մնացորդը, 2012 թվականի դեկտեմբերի 31-ի դրությամբ, կազմել է 110 միլիարդ 897 միլիոն 66 հազար 586 դրամ, կամ` մոտ 271 միլիոն 806 հազար 500 դոլար, եթե ընդունենք, որ այդ ժամանակ դոլարի փոխարժեքը եղել է 408 դրամ` 1 դոլարի դիմաց:

Այսինքն` ակնհայտ է, որ անգամ ընկերության կողմից ներկայացված հաշվետվությամբ, ընկերության ունեցած կապիտալը մոտ 90 միլիոն դոլարով ավելի շատ է, քան այն գինը` 180 միլիոն դոլարը, որով ընկերությունը վաճառվեց ամերիկացիներին:

Շահութաբերության առումով`համալիրի տարեկան նախագծային արտադրանքը 1 միլիարդ 160 միլիոն կՎտ/ժամ է: «Որոտանի ՀԷԿՀ»- ում արտադրված 1 կՎտ/ժամ էլեկտրաէներգիայի համար Հանրային ծառայությունները կարգավորող հանձնաժողովի` №191Ա որոշման համաձայն` երկդրույք սակագնային համակարգում որոշվել է առաքվող էլեկտրաէներգիայի դրույքը սահմանել 6.834 դրամ/կՎտժ՝ առանց ավելացված արժեքի հարկի եւ 8.201 դրամ/կՎտժ, ներառյալ` ավելացված արժեքի հարկը:

Իսկ մինչ այդ բարձրացումը` միայն 2012 թվականին, ընկերությունը արտադրանքի իրացումից, ըստ իր իսկ կողմից հրապարակված ֆինանսական հաշվետվության, ստացել է մոտ 6 միլիարդ 318 միլիոն 908 հազար դրամ եկամուտ: «Որոտանի ՀԷԿՀ»-ի արժեքի մեջ պետք է ներառվի նաեւ կառավարության 2013 թվականի նոյեմբերի 21-ին ` «Որոտանի ՀԷԿ-երի համալիր» ՓԲԸ-ի կանոնադրական կապիտալն ավելացնելու մասին» որոշումով էլ 89 միլիոն 349 հազար 826 դրամ արժեքի չափով լրացուցիչ բաժնետոմսերի տեղաբաշխման միջոցով՝ «Որոտանի հիդրոէլեկտրակայանների համալիր» ՓԲԸ-ի կանոնադրական կապիտալը ավելացնելու մասին որոշումը: Այդ որոշմամբ  ընկերությանը հանձնվեցին նաեւ Սպանդարյանի (257 մլն խմ), Անգեղակոթի (3,4 մլն խմ տարողությամբ), Տոլորսի (96 միլիոն խմ) եւ Շամբի (13.6 միլիոն խմ) ջրամբարները:

Այնինչ` «Ջրի ազգային ծրագրի մասին» օրենքով` այս ջրամբարները համարվում են ռազմավարական նշանակության օբյեկտներ, որոնք գտնվում են հատուկ պահպանության տակ, համարվում են պետական սեփականություն եւ ենթակա չեն մասնավորեցման: Նույն օրենքով` Սպանդարյանի եւ Տոլորսի ջրամբարները ներառված են պետական հատուկ նշանակության համակարգերի ցուցակում:

Հոդվածը` այլ ուշագրավ փաստերով, կարդացեք շուտով: