Որքա՞ն արժեն պատվիրված սպանությունները Հայաստանում

Հայտնի է, որ երբ «քիլերը» սպանությունը կատարելուց հետո հրազենը թողնում է դեպքի վայրում, հանցագործությունը որակվում է որպես պատվիրված: Ըստ այս` չգրված օրենքի տրամաբանության` հավանական է, որ պատվիրված սպանություն էր նաև  հանցավոր աշխարհում հայտնի Կայարանցի Թևոսիկի եղբոր` Արթուր Սաֆարյանի սպանությունը հունվարի 27-ին Սարյան փողոցում, քանի որ սպանություն կատարածը դեպքի վայրում էր թողել «Մակարով» տեսակի ատրճանակ, որի փամփշտակալում եղել է 1 փամփուշտ:

Հետաքրքիր է` ի՞նչ արժեն այսօր պատվիրված սպանությունները Հայաստանում:

«Դա հարաբերական է: Ոչ ոք ստույգ չի կարող ասել: Գուցե մեկը պատվեր տա 300 դոլարից մինչև 500 հազար դոլար»,- Yerkir.am-ի հետ զրույցում ասաց քրեագետ, գրող Սերգեյ Գալոյանը և հավելեց, որ ժամանակին պատահել է, որ անգամ 500 դոլարով էլ են մարդ սպանել:

«Հիմա ասում են` Հայաստանում մարդ սպանելը 5000-10000 դոլարից պակաս չի լինի, իսկ քրեական հեղինակություններին սպանելը սովորական գնից առնվազն տասն անգամ ավելի արժի»,- նշեց գրողը:

Գալոյանը նաև կատակեց, որ, օրինակ, եթե ինչ-որ մեկը ցանկանա իրեն սպանել, դա շատ թանկ կնստի նրա վրա: «Եթե խելոք պատվիրատու լինի և խելոք «քիլլեր», գոնե ամենաքիչը 1 մլն 150 հազար դոլարով պետք է պատվիրի: Իմ գինը ես այդքան եմ գնահատում, դրանից ցածրին ես համաձայն չեմ»,- ծիծաղելով ասաց քրեագետը: