Պարտադիր կենսաթոշակայինը մեր լռության արդյունքն է. Լալա Մնացականյան

Եթե դու մտածում ես, որ ինձ համար լավ լինի, ինչո՞ւ ես այդ լավությունն ինձ պարտադրում. Yerkir.am-ի հետ զրույցում նշեց դերասանուհի Լալա Մնացականյանն` անդրադառնալով պարտադիր կենսաթոշակային համակարգին: Նա դեմ է օրենքին, քանի որ ինքն, առհասարակ, դեմ է այն ամենին, ինչ պարտադրվում է մարդկանց:

«Եթե որոշումը պարտադրված է, ուրեմն տեղին չէ, ինչ-որ բան այն չէ: Թողեք` ես որոշեմ` ի՞նչ եմ անելու այդ փողը»,- ասաց Մնացականյանը:

Նրա կարծիքով` իշխանությունները, կարծես, դիրքորոշում չունեն եւ գտել են մի լավ տարբերակ` լռել: Այս լռությունը, Մնացականյանի կարծիքով, ուղղակի լռություն չէ` իշխանությունները կա'մ մտածում են` դե, սա էլ կանցնի, կգնա, կա'մ էլ հաշվարկում են, թե ինչ կարելի է անել:

«Ես ոչ թե մտածում եմ` լավ, հույս ունենանք լավ կլինի, այլ կարծում եմ, որ մենք արժանի ենք, քանի որ շատ անօրինականությունների դեմ աչք ենք փակում, լռում ենք: Սա մեր լռության արդյունքն է, իսկ հետեւանքները... Կարող է անկառավարելի դառնալ, եթե մենք այդպես էլ այլընտրանքային առաջնորդ չունենանք»,- ասաց Մնացականյանը` հավելելով, որ առաջնորդը պետք է լինի պայքարող եւ ազնիվ. «Եթե ժողովրդի 80 տոկոսից ավելին դուրս է գալիս բողոքի, սա ավելին է, քան իշխանափոխությունը, քանի որ նույնիսկ պետական կառույցներում են դժգոհ իրավիճակից: Ամեն ինչ վերածել են թալանի, արգելակներ չկան: Կա'մ բոլորս կգլորվենք ներքեւ, կա'մ կգա մեկը եւ կշրջի մեր ճանապարհը»: