Տրանսվեստիտ մարմնավաճառները Կոմայգին փոխարինել են տաք տներով

Կոմայգում կանգնող տրանսվեստիտ մարմնավաճառներն այժմ սկսել են տանը զբաղվել իրենց գործով եւ այգում այլեւս չեն կանգնում: Այս մասին Yerkir.am-ի հետ զրույցում նշեց «Մենք» երիտասարդական շարժման փոխնախագահ Սեւան Աղաջանյանը:

Նա տեղեկացրեց նաեւ, որ իրենք պարզել են` տրանսվեստիտ մարմնավաճառների մեծ մասը արտաքսված է ընտանիքից, ապրում են վարձով բնակարաններում: Աղաջանյանին հաջողվել է իմանալ նաեւ նրանց հասցեները, նա պատրաստվում է զրուցել բնակարանների տերերի հետ` պարզելու համար` տեղյա՞կ են արդյոք, որ իրենց վարձակալներն այլասերվածությամբ են զբաղվում իրենց տանը:

«Կարծում եմ` ոչ մի հայ չի ցանկանա, որ իրենց տունը վերածեն մարմնավաճառության բնի, ոչ ոք չպետք է հանդուրժի այլասերվածությունը: Վստահ եմ, որ այն մարդիկ, ովքեր կիմանան, որ իրենց վարձակալը ոչ ավանդական սեռական կողմնորոշում ունի եւ իր տանը զբաղվում է մարմնավաճառությամբ, ձեռքերը ծալած չեն նստի»,- ասաց Աղաջանյանը: