Լարված իրավիճակ` ԱԺ-ի մոտ

ԱԺ շենքի առջեւ բողոքի ցույց անցկացնող ակտիվիստները որոշեցին անցնել կտրուկ գործողությունների: Նրանք, ուս ուսի տված, փակեցին Բաղրամյան պողոտան` ամբողջությամբ կանգնեցնելով երթևկությունը եւ վանկարկելով` ստրուկներ, դավաճաններ:

Ոստիկանությունը անցավ կտրուկ գործողությունների, նրանք ուժով հեռացրեցին ակտիվիստներին փողոցներից, իսկ այնուհետեւ բազմաթիվ ակտիվիստների նստեցրեցին ոստիկանական մեքենաներ: Ցուցարարների մնացած մասին ճարտարապետների միության շենքի առջև օղակել են հատուկ ջոկատայինները և չեն թույլատրում ոչ մի տեղաշարժ: Տարածքում գտնվում են ոստիկանության բազմաթիվ հատուկջոկատայիններ, հատուկ նշանակության մեքենաներ: Դրանցից երկուսի մեջ այս պահին գտնվում են ձերբակալված ակտիվիստներ: Նրանց ինքնությունը և թիվը դեռևս հայտնի չէ:

Տեղեկացնենք, որ դրանից առաջ ակտիվիստները ԱԺ-ի առաջ բողոքում էին արտահերթ նիստում ընդգրկված հարցերի դեմ` հայտարարելով, որ բոլոր նրանք, ովքեր կողմ կքվեարկեն  հայ-ռուսական միջկառավարական համաձայնագրերի վավերացմանը, դավաճաններ են:

Քիչ առաջ բաց թողեցին մի ոստիկանական մեքենայում գտնվող ակտիվիստներին, որոնք թվով 6-ն են: 7-րդին դեռ պահում են, նրա քիթը կոտրված է: