Շանթի ընկերները մտահոգված են, որ նրա նկատմամբ դատավարություն չի լինի

«Ազատ Հայք» նախաձեռնող խմբի անդամ Ռուբեն Մնացականյանը եւ ազատամարտիկ Սուրեն Սարգսյանն այսօր լրագրողների հետ հանդիպման ժամանակ հայտնեցին, որ հանդես են գալու ի պաշտպանություն եւ ի զորակցություն Շանթ Հարությունյանի:

Նրանք նշեցին, որ Հայաստանում եւ Սփյուռքում ձեւավորվել են բազմաթիվ քաղաքացիական նախաձեռնող խմբեր, որոնք հետեւելու են Շանթ Հարությունյանի գործի դատավարությանը եւ ըստ այդմ էլ` մշակելու են իրենց գործողությունների հետագա պլանը: Նրանք մտահոգված են, որ հնարավոր է` Շանթի նկատմամբ դատավարություն չլինի, լավագույն դեպքում` հոգեբուժարանում երկարատեւ պահելուց հետո նրան անմեղսունակ կճանաչեն ու ազատ կարձակեն ընտանիքի հսկողության տակ: Այդ դեպքում, ըստ Ռուբեն Մնացականյանի, Շանթի ընկերների հանդեպ կշարունակեն դատավարությունը, եւ կլինեն ընտրովի որոշումներ` ում ցանկանան կարդարացնեն, ում ոչ` ոչ: Ահա` ինչու նրանք պահանջում են, որ Շանթ Հարությունյանի եւ նրա հետ նույն գործով ձերբակալվածների հնարավոր դատավարությունը տեղի ունենա դատաիրավական համակարգի ամենամեծ դահլիճում եւ հեռարձակվի Հանրային հեռուստաընկերությամբ եւ ռադիոյով:

«Պահանջում ենք ազատ արձակել Շանթ Հարությունյանին հոգեբուժարանից եւ տեղափոխել նրան սովորական ռեժիմի տարածք, որից հետո կիրականացնեն դատավարություն»,- ասաց Ռուբեն Մնացականյանը: