Չի բացառվում, որ ապրիլի 24-ից հետո Սեֆիլյանը եւ նրա ընկերները ազատ արձակվեն

Այսօր` խորհրդարանական ճեպազրույցների ժամանակ, լրագրողները ԱԺ ՀՅԴ խմբակցության ղեկավար Արմեն Ռուստամյանից հետաքրքրվեցին, թե արդյո՞ք Հիմնադիր խորհրդարանի անդամների ձերբակալությամբ չի ոտնահարվում Սահմանադրությունը: Արմեն Ռուստամյանը պատասխանեց, որ Սահմանադրության ոտնահարման կամ չոտնահարման հարցը պարզ կդառնա այն ժամանակ, երբ պարզ լինեն ձերբակալության ամբողջ պատկերը և հիմքերը:

«Ժամանակին ես այդ թեմայով խոսել եմ, բայց, դժբախտաբար, այն սխալ է ընկալվել: Եվ փոխանակ դա զգուշացում լիներ Սեֆիլյանի ու նրա ընկերների համար, դրա փոխարեն ինչ-որ վայրահաչություններ, անկապ արձագանքներ լսեցի: Ակնհայտ էր, որ սա կարող էր բերել նման հետևանքների: Բացատրեցի` ինչ է նշանակում ծայրահեղ անհրաժեշտություն պետության ներսում: Այն հոդվածը, որի հետ կապված հետապնդում է իրականացվել, հենց այդ կանխարգելման հետ է կապված, որովհետև խոսքը գնում է նախապատրաստության մասին, ինչը պետք է կանխարգելի համապատասխան իրավասու մարմինը: Բայց ինձ մոտ այնպիսի տպավորություն է, որ Ժիրայրը և նրա ընկերները կարծես հենց իրենք էլ ուզում էին, որ իրենց ձերբակալեն: Պարզ էր, որ այս ամեն ինչը բերելու է դրան, պարզ էր, որ որևէ գործողություն ապրիլի 24-ի հետ կապելը կարող էր բերել համապատասխան վերաբերմունքի համապատասխան մարմինների կողմից:

Չեմ էլ բացառում, որ ապրիլի 24-ից հետո ձերբակալության հիմքերը կվերանան, և նրանք 24-ից հետո ազատ կարձակվեն: Սա չեմ բացառում: Բայց ակնհայտ բաները պետք է կարողանալ տեսնել, եթե դա չեն տեսնում, մանավանդ` քաղաքական պայքարի դուրս ելած մարդիկ, դա պրոբլեմ է իրենց համար:

Միշտ էլ ասել եմ, որ քաղաքական պայքարը ընդունելի է մեզ համար, և պետք է միշտ կարողանալ հարգել քաղաքական ուժի մոտեցումները, եթե անգամ չեն համապատասխանում քո քաղաքական պատկերացումներին: Իշխանափոխության պահանջ կարող է դնել ցանկացած ոչ իշխանական քաղաքական ուժ, բայց դրա ժամանակը կա, տեղը կա, իրականացնելու ձևերը կան: Կարծում եմ` նրանք իրենց պայքարը կարող են շարունակել, բայց այդպես անպայման չֆիքսվել ապրիլի 24-ի վրա, որովհետև այդ օրը լայն միջազգային ներկայացվածություն է լինելու Հայաստանում, ինչը նյարդայնացնում է Թուրքիային: Այս ամենն իր տարողունակության մեջ պետք գնահատվեր, և գործողությունները պետք է մշակվեին դրան համապատասխան»,- ասաց նա:

Լրագրողները ճշտող հարց ուղղեցին պատգամավորին` այն, որ ապրիլի 24-ից հետո հնարավոր է՝ ձերբակալության հիմքերը վերանան, դա չի՞ նշանակում, որ ձերբակալությունը հակասահմանադրական էր, Արմեն Ռուստամյանը պատասխանեց. «Եթե ինչ-որ բան կանխարգելում են, նկատի են առնվում հենց այդ օրվա իրադարձությունները ու պայմանները, որում հայտնվելու է Երևանը: Ապրիլի 24-ին գնահատվել է, որ կա հանցագործության վտանգ, իսկ ապրիլի 24-ից հետո դժվար է լինելու իրավապահներին բացատրել, թե էլ ինչի՞ է վտանգը պահպանվում: Այլ հարց է, որ ասեն՝ պետք է քննություն լինի: Վստահ եմ, որ Ժիրայրը և նրա ընկերները ունեն բոլոր հնարավորությունները, որ եթե ինչ-որ բան ճիշտ ընթացքի մեջ չլինի, դիմեն ընդհուպ Եվրոպական դատարան»:

Այն հարցին, թե ինչո՞ւ է պետք դիմել Եվրոպական դատարան ու բյուջեից փողեր ծախսել, եթե կարելի է այդ ամենը օրինականության սահմաններում անել, պատգամավորը պատասխանեց. «Եվրոպական դատարանը մեր դատական համակարգի մաս է: Չեմ ասում՝ գնան, հասնեն Եվրոպական դատարան, եթե իրենք կբավարարվեն ներպետական ընթացակարգով: Եվրոպական դատարանի հանգամանքը զսպող է հենց պետության ներսում դատական իշխանության համար»: