Խնդիրները ճիշտ դնելու դեպքում Հայաստանը կհասնի հաջողության. Արմեն Ռուստամյան

Արտաքին քաղաքականության մեջ համառորեն սխալներ կրկնելու պարագայում հնարավոր է, որ Հայաստանը հայտնվի անօգնական վիճակում, մեկուսացման մեջ: Այս մասին լրագրողների հետ ճեպազրույցում ասաց ԱԺ ՀՅԴ խմբակցության ղեկավար Արմեն Ռուստամյանը` խոսելով Հայաստանի արտաքին քաղաքականության մասին:

Նրա խոսքով` Հայաստանը դեռ ունի արտաքին քաղաքականության մեջ հարցերը ճիշտ դնելու ու հաջողությունների հասնելու հնարավորություն: Ըստ պատգամավորի` Հայաստանն այսօր ունի կենսականորեն կարևոր խնդիրներ, որոնց լուծման համար իրավունք ունի ցանկացած երկրի հետ իր հարաբերությունները ամրապնդել` անկախ այն բանից, թե դրա մասին ինչ են մտածում այլ երկրներ: Ռուստամյանը բերեց Իրանի հետ տնտեսական հարաբերությունների օրինակը, ինչը դուր չի գալիս ԱՄՆ-ին: Բայց նաև ԱՄՆ-ը հասկանում է, որ այդ հարաբերությունները Հայաստանի համար կենսական անհրաժեշտություն են:

Ռուստամյանի խոսքով` Հայաստանն ունի խոշորածավալ` կենսական անհրաժեշտության խնդիրներ և հենց դրանցով պետք է ներկայանա թե' Եվրոպային, թե' Մաքսային միությանը: «Ինչո՞ւ մենք ասացինք, որ ուրիշ ճար չկար գնալու այլ ուղղությամբ, որովհետև դրված էր մեր անվտանգության խնդիրը, որը լինելիության աստիճանի կարևոր էր: Եվ պետք էր տեղափոխվել այն դաշտը, որտեղ հնարավորինս կլուծվեր այդ հարցը, և որևէ մեկը չի կարող դրանում մեզ մեղադրել»,- ասաց պատգամավորը:

Նրա համոզմամբ` Հայաստանը պետք է միջազգային հարթակում տնտեսական արտոնությունների հավակնի, որովհետև ունի անվտանգության խնդիր` շրջափակման մեջ լինելով երկու կողմից, դեպի ծով ելք չունենալով: Շարունակելով թեման` նա նշեց, որ Ադրբեջանը, շահարկելով հակամարտության թեման, հասավ այն բանին, որ աշխարհին ասաց` իմ ժողովրդավարության մակարդակի վրա աչք փակեք: Ահա, թե ինչու երբ խնդիրները ճիշտ են դրվում, հնարավոր է հասնել հաջողությունների` ամրապնդելով այն, ինչ արդեն ունես:

«Եթե Ուկրաինան, ներկայացնելով իր հիմնավորումները, հայտարարեց, որ չի կարող խզել իր հարաբերությունները Ռուսաստանի հետ, Հայաստանը ի՞նչ պետք է աներ, այն դեպքում, երբ ռազմական ու էներգետիկ անվտանգության տեսակետից 100 տոկոսով կախվածություն ունի Ռուսաստանից»,- ընդգծեց Ռուստամյանը` հավելելով, որ Եվրոպան էլ սխալ վարվեց` Հայաստանին մղելով այլընտրանք չունենալու դաշտը: