Գազի գնի տարբերությունը սուբսիդավորելու է ռուսական կողմը

Ինչպե՞ս է լուծվելու գազի թանկացումից հետո առաջացած` 90 դոլար տարբերության հարցը: Խոսվում է, որ Ռուսաստանը սուբսիդիայի տեսքով պետք է այդ պարտքը մարի: Որքա՞ն է քաղաքացին մուծում, և որքա՞ն ենք մենք «Հայռուսգազարդ»-ին վճարում: Այսօր 2014թ. բյուջեի քննարկման ժամանակ ԱԺ ՀԱԿ խմբակցության քարտուղար Արամ Մանուկյանը այս հարցերն ուղղեց ՀՀ էներգետիկայի նախարար Արմեն Մովսիսյանին:

Նախարարի խոսքով` երկար տևեցին այդ հարցի հետ կապված քննարկումները. սկզբում համաձայնության են եկել ռուսական կողմի հետ, հետո առաջացել է իրավական կարգավորման խնդիր, որին գումարվել է Մաքսային միությանը միանալը, և հիմա խնդիրը լուծվում է նոր իրականության լույսի ներքո: «Այս պահին ընթանում են վերջին քննարկումները, շուտով ռուսական կողմի հետ`  մինչև Նոր տարի, կստորագրենք համաձայնագիր, որպեսզի ռուսական կողմը սուբսիդավորի մեր կառավարությանը, որ այդ տարբերությունը վճարվի»,- ասաց նախարարը: