Ճշմարիտ ընդդիմությունը իշխանություններին պետք է աջակցի արտաքին քաղաքական հարցերում. Աղվան Վարդանյան

ԱԺ ավանդական ճեպազրույցում պատասխանելով  լրագրողի` Մաքսային միությանն անդամակցելու ուղղությամբ Հայաստանի իշխանությունների ակտիվ նախապատրաստական աշխատանքների վերաբերյալ հարցին` ԱԺ ՀՅԴ խմբակցության քարտուղար Աղվան Վարդանյանը նշեց, որ սեպտեմբերին Դաշնակցությունը ստեղծել էր փորձագիտական խումբ` հասկանալու խնդրի բոլոր կողմերը, նաև` թե ինչ խնդիրներ են դրվելու բանակցությունների ժամանակ:

Ինչ վերաբերում է բուն գործընթացին, Դաշնակցությունը հայտնել է իր կարծիքը, որ դա իրենց համար անակնկալ էր, և ճիշտ չէ նման որոշում կայացնել` առանց խորհրդակցելու քաղաքական կուսակցությունների ու Ազգային ժողովի հետ: «Բայց նաև, պրագմատիկ լինելով, հասկանում էինք, որ մեզ այլընտրանք չեն թողնելու` Արցախյան խնդրի հետ կապված: Բայց որ այս խնդրում մենք չպետք է գնանք անձնատվության ու պետք է պաշտպանենք մեր շահերը, դա կարևոր է: Ակնհայտ է, որ մեր հակառակորդները` ադրբեջանական ու թուրքական լոբբին, փորձելու են մեր հանդեպ այլ տրամադրություններ ստեղծել, այնպես որ` վիթխարի աշխատանքներ կան տանելու, և դա պետք է գիտակցեն իշխանությունները: Պետք է աշխատենք միասին: Ճշմարիտ ընդդիմության համար ճիշտ ուղղություն է արտաքին քաղաքականության ոլորտում իշխանություններին աջակցելը»,- ասաց Աղվան Վարդանյանը:

Այս առումով Վահան Հովհաննիսյանին Գերմանիայում դեսպան նշանակելը ՀՅԴ խմբակցության քարտուղարը համարում է կարևոր փաստարկ: «Կկարողանա՞ մեր պետությունը, արժանապատիվ ձևով իր շահերը պաշտպանելով, հարաբերվել, դա ամեն մեկիցս է կախված»,- ասաց նա: