Էդիկ Բարսեղյանը սպասում է նորանշանակ մարզպետին

Արարատի` արդեն նախկին մարզպետ Էդիկ Բարսեղյանը ողջունում է Արամայիս Գրիգորյանի նշանակումը Արարատի մարզպետի պաշտոնում, ողջունում է Սերժ Սարգսյանի կադրային քաղաքականությունը:

Yerkir.am-ի հետ զրույցում Էդիկ Բարսեղյանը նշեց, որ վստահ է` Արամայիս Գրիգորյանը շատ լավ կաշխատի: Նորանշանակ մարզպետի հետ նախկին մարզպետը աշխատելու առիթ ունեցել է, ճանաչում է, շատ ջերմ հարաբերությունների մեջ է: Խանդի զգացողություն չունի:

«Այն ժամանակ կլիներ, եթե ինձ ազատեին աշխատանքից, իրենք նպաստեին, որ ինձ ազատեն: Բայց ես, թերեւս, երեք շաբաթ առաջ խնդրել եմ ՀՀ նախագահին, որ, իմ դիմումի համաձայն, ինձ ազատեն աշխատանքից, ես գնամ ակտիվ հանգստի»,- նշեց նախկին մարզպետը:

Հարցին` մտավախություն չունե՞ք, որ նորանշանակ մարզպետը կազատվի Ձեր կադրերից, Բարսեղյանը պատասխանեց. «Աշխատող մարդուն չեն ազատում, աշխատող մարդու հետ աշխատում են: Եթե կլինեն այնպիսի աշխատողներ, որոնք կթերանան իրենց աշխատանքում, բնական է, որ կազատվեն»:

Նորանշանակ մարզպետին դեռ չի հասցրել շնորհավորել: «Սպասում եմ իրեն, որ գա»,- ասաց Էդիկ Բարսեղյանը: