ՀՐԱՊԱՐԱԿ. Բարսեղյանը նախագահին դե՞մ է գնացել

Երեւանի Ավան եւ Նոր Նորք դատարանի դատավոր Սամվել Մնացականյանի լիազորությունները դադարեցնելու հարցը Արդարադատության խորհրդում քննարկելու ժամանակ Գերագույն դատարանի նախկին նախագահ, ԱԽ անդամ Տարիել Բարսեղյանը լքել էր նիստը` չմասնակցելով քվեարկությանը, եւ ասել էր` եթե դադարեցվեն դատավորի լիազորությունները, ինքն էլ դուրս կգա ԱԽ-ից, նաեւ` որ դիմելու է ՀՀ նախագահին: Նախօրեին դատավորի լիազորությունները դադարեցվեցին` ՀՀ նախագահի հրամանագրով:

Թերթի տեղեկություններով` նախագահականից հաշիվ են պահանջել Տարիել Բարսեղյանից, թե` ինչպե՞ս ես համարձակվել Սերժ Սարգսյանին դեմ գնալ, մի՞թե պարզ չէ, որ նման հարցերն իր հրահանգով են լուծվում, եւ պահանջել են ԱԽ անդամակցությունից հրաժարվելու դիմում գրել:

Երեկ Տ. Բարսեղյանից թերթը փորձել է պարզել, թե պատրաստվո՞ւմ է հրաժարականի դիմում գրել: Բարսեղյանը պատասխանել է. «Ես դիմում չեմ գրել եւ չեմ պատրաստվում գրել»: