Քաղաքական կատականի

Վարչապետի չզինված ուժերը

Կառավարության հոկտեմբերի 8-ի նիստը «պատմական» էր. կառավարության անդամներից շատերն առաջին անգամ զինվորական համազգեստ էին հագել: Ասում են` նիստում ելույթ ունեցողները մինչև ելույթը նախ «չեստ» էին տալիս «կամանդիրին»: Հատկապես ակտիվ «չեստ» է տվել նախարարների «զվոդը»: «Կամանդիր» Տ. Սարգսյանի հրամանով` նիստից հետո բոլոր չունեցողներին տրվել են զինգրքույկներ` զինվորական ծառայություն անցնելու վերաբերյալ:

«Մկրտությունից» հետո

Նախարարության այսօրվա նիստից անմիջապես հետո, ՀՀ վարչապետ, նիստի «կամանդիր» Տիգրան Սարգսյանի միջնորդությամբ, նախարարներ Արմեն Աշոտյանն ու Հրայր Թովմասյանը ներկայացվել են պարգևատրման. նրանց կշնորհվի «Մարտական խաչ» առաջին աստիճանի շքանշան:

Ելք

Կառավարության` այսօր կայացած նիստից առաջ, երբ կառավարության անդամները նախապես տեղեկացվել են, որ ներկայանան զինվորական համազգեստներով, Սփյուռքի նախարար Հրանուշ Հակոբյանն ընկել է անհարմար դրության մեջ. տիկնոջ հագով կանացի զինվորական համազգեստ չի ճարվել, և նա ստիպված նիստին ներկայացել է տիեզերագնացի շորերով: 

Իբր

Թարսի պես` կառավարության զինվորական նիստին համազգեստով չի կարողացել ներկայանալ նաև կառավարության մյուս կին անդամը` Հասմիկ Պողոսյանը: Նրա հագով էլ կանացի զինվորական համազգեստ չի ճարվել, և նա կառավարություն է եկել սպիտակ խալաթով` իբր «սանչաստի» Հասոն է:

Լ. ՍԱՐԳՍՅԱՆ