Պատրաստակամ ենք նախաստորագրել ասոցացման համաձայնագրի քաղաքական մասը. Շարմազանով

ՀՀԿ ԳՄ այսօրվա նիստում կադրային հարցեր չեն քննարկվել. նիստի ավարտից հետո լրագրողների հետ զրույցում հայտնեց ՀՀԿ մամլո խոսնակ Էդուարդ Շարմազանովը:

Անդրադառնալով ապագա զինդատախազի հարցին` Շարմազանովը նշեց, որ ՀՀԿ ԳՄ-ն այն մարմինը չէ, որտեղ պետք է քննարկվեն ուժային կառույցների ղեկավարների նշանակման հարցերը:

Պարզվում է՝ ՀՀԿ ԳՄ նիստում անդրադարձ չի կատարվել նաեւ ԵԽԽՎ-ում Զարուհի Փոստանջյանի` Սերժ Սարգսյանին ուղղված հարցին: Շարմազանովը նշեց, որ նախագահը հնարավորություն ունեցել է Ստրասբուրգում բոլոր հարցերին պատասխանելու: Ըստ նրա՝ Սերժ Սարգսյանի ելույթը կանխատեսելի եւ վստահելի գործընկերոջ ելույթ էր:

Ըստ ՀՀԿ մամլո խոսնակի` իրենք ռուս եւ եվրոպացի գործընկերների հետ հարաբերությունները չեն դիտարկում որպես իրար հակասող, ավելին` դրանք փոխլրացնող գործընթացներ են:

«Մենք պատրաստակամ ենք նախաստորագրել ասոցացման համաձայնագրի քաղաքական մասը՝ առանց ԽՀԱԱԳ պայմանագրի: Ասոցացման համաձայնագրի մեխը քաղաքական բարեփոխումներն են»,- նշեց Շարմազանովը: