Չեխիա-Հայաստան խաղին ընդառաջ

Այսօր, Երևանի ժամանակով 20:00-ին Պրահայի «Էդեն Արենա» մարզադաշտում Հայստանի ազգային հավաքականը 2014թ-ի աշխարհի առաջնության ընտրական փուլի շրջանակներում իր ուժերը կչափի Չեխիայի ազգային ընտրանու հետ:

Խմբից դուրս գալու հնարավորություն Հայաստանը դեռևս պահպանում է: Չնայած, որ բուքմեյքերները չեն հավատում դրան:

 Մեր տղաները  մեկ անգամ չէ, որ արտագնա հանդիպումներում ցույց են տվել այնպիսի խաղ, ինչպիսին տանը տեսնելն` երազելու նման է:

Մալթայից կրած նվազագույն հաշվով ամոթալի պարտությանը հետևեց դրսում` Դանիայի հավաքականի ջախջախումը:  Մի բան հստակ է`Հայաստանի ընտրանու համար` խաղից առաջ որևէ կանխատեսում անելը գրեթե  անհնար է:

Հայաստանի ազգային հավաքականի գլխավոր մարզիչ Վարդան Մինասյանը Չեխիա-Հայաստան հանդիպմանը  հայտավորել է հետևյալ կազմը` Ռոման Բերեզովսկի, Հրայր Մկոյան, Ռոբերտ Արզումանյան, Վարազդատ Հարոյան, Կամո Հավհաննիսյան, Կառլեն Մկրտչյան, Արթուր Եդիգարյան, Գեւորգ Ղազարյան, Արաս Օզբիլիս, Հենրիխ Մխիթարյան, Յուրա Մովսիսյան:

Ինչպես երևում է` հարձակվողական փայլուն գիծ, դրան էլ գումարվում է Յուրա Մովսիսյանի և Արազ Օզբիլիսի նույն ակումբում հանդես գալը և խաղային փոխհամաձայնության փորձը. խնդիրներ հարձակման մեջ, կարծում եմ` չենք ունենա, իսկ ահա խոցելի պաշտպանությունը, որն արդեն հասցրել են նկատել մեր մրցակիցները` մտահոգվելու տեղիք է տալիս:

Որքան էլ մեր թիմը փորձի կենտրոնանալ հակագրոհների վրա, չեխերի դեմ թույլ պաշտպանույամբ խաղալը նման է անդունդի եզրով վազելուն, մանավանդ այն դեպքում, երբ Չեխիայի հավաքականի գլխավոր մարզիչ Միխալ Բիլեկը բազմիցս նշել է, որ Հայաստանի ընտրանին ունի թույլ պաշտպանություն, այսինքն կարելի է ենթադրել, որ չեխերը կօգտվեն հենց այդ «աքիլեսյան գարշապարից»:

Խաղը մեծ հետաքրքրություն է առաջացրել ֆուտբոլասերների մոտ: Մամուլում շրջանառվող մեկնաբանություններից երևում է, որ մեր մրցակցի երկրպագուները վստահ են իրենց հաղթանակի վրա, սակայն նրանք մի բան հաստատ մոռանում են, որ խաղալու են այնպիսի անկախատեսելի մրցակցի հետ, ինչպիսին մեր` Հայաստանի ազգային հավաքականն է, որին, ինչպես փորձն  է ցույց տալիս, հաղթանակի համար, անհրաժեշտ է խփել հանդիպման առաջին գնդակը…

Հուսանք և սպասենք...

Շուշանիկ ՀԱԿՈԲՅԱՆ