Նշան Մունչյանը պարգևատրվել է ՀՀ սպորտի նախարարության ոսկե մեդալով

 Հուլիսի 1-ին Լոս Անջելեսում տեղի է ունեցել ԽՍՀՄ բազմակի չեմպիոն,  Եվրոպայի չեմպիոն, անկախ Հայաստանի պատմության մեջ  առաջին անգամ աշխարհի չեմպիոնի տիտղոսը նվաճած գերթեթև քաշային բռնցքամարտիկ Նշան Մունչյանի ծննդյան 50-ամյա հոբելյանին նվիրված հանդիսավոր միջոցառում. հայտնում է msy.am-ը:

Նշան Մունչյանը  2007-ից բնակվում է Միացյալ Նահանգներում  և Լոս Անջելեսի  «International Sports Union» սպորտային ակումբի բռնցքամարտի գլխավոր մարզիչն է:

50-ամյակի միջոցառմանը ներկա են եղել հյուրեր նաև Հայաստանից: Մարզական մեկնաբան Վարդան Թադևոսյանը ՀՀ սպորտի և երիտասարդության հարցերի նախարար Յուրի Վարդանյանի անունից Նշան Մունչյանին է հանձնել ՀՀ սպորտի և երիտասարդության հարցերի նախարարության ոսկե մեդալը:  Նշան Մունչյանին են հանձնվել նաև  ՀԱՕԿ-ի և Հայաստանի բռնցքամարտի ֆեդերացիայի ոսկե մեդալները:

Նշան Մունչյանին հաճելի նվեր է մատուցել նրա ամերիկյան սաներից Ֆերդինանդ Քերոբյանը` դառնալով բռնցքամարտի ԱՄՆ պատանիների չեմպիոն: