ՌԴ-ն իրավական հիմք ունի Սնոուդենին արտահանձնելու համար. ԱՄՆ

ԱՄՆ իշխանությունները կարծում են, որ Ռուսաստանն ունի հստակ իրավական հիմք ԿՀՎ նախկին աշխատակից Էդվարդ Սնոուդենին ԱՄՆ-ին արտահանձնելու համար. հայտնում է Лента.ру-ն:

ԱՄՆ ազգային անվտանգության մամուլի քարտուղար Քեյթլին Հայդենը հայտարարել է, որ համապատասխան իրավական հիմքերն են Սնուդենի գործող անձնագրի բացակայությունը և գաղտնի տեղեկությունների տարածման պաշտոնական մեղադրանքը:

ՌԴ նախագահ Վլադիմիր Պուտինը, սակայն, հունիսի 25-ին, հայտարարել է, որ Ռուսաստանը կարող է հանցագործներին հանձնել այլ պետությունների միայն համապատասխան երկկողմ համաձայնագրի առկայության դեպքում, իսկ Ռուսաստանի ու ԱՄՆ-ի միջև նման համաձայնագիր չկա:

Այժմ Սնոուդենը գտնվում է «Շերեմետևո» օդանավակայանի տարանցիկ գոտում և չի կարող անցնել սահմանը, քանի որ նրա ամերիկյան անձնագիրը չեղյալ է համարվել: