Քայլերթ` դեպի ոստիկանություն, դատախազություն, դատարան...

Այսօր  ՄԱԿ-ի կողմից հռչակված` Խոշտանգումների զոհերի աջակցության միջազգային օրն է:

Այդ կապակցությամբ  մի շարք միջոցառումներ են կազմակերպել «Քաղաքացիական հասարակության ինստիտուտ» (ՔՀԻ) և «Ընդդեմ իրավական կամայականության» (ԸԻԿ) հասարակական կազմակերպությունները: Կազմակերպությունների անդամների և ակտիվիստների մասնակցությամբ` այսօր առավոտյան կանցկացվի քայլերթ և պիկետ մի շարք շահագրգիռ պետական մարմինների առջև, այդ թվում` 10.30-ին` ՀՀ ոստիկանության, 11.45-ին` Կենտրոն-Նոր Նորք վարչական շրջանների ընդհանուր իրավասության դատարանի և 12.30-ին` ՀՀ դատախազության, ՀՀ հատուկ քննչական ծառայության և ՀՀ Վճռաբեկ դատարանի առջև:

Միջոցառման նպատակն է բարձրաձայնել համակարգում խոշտանգումներ կիրառողներին պատասխանատվության ենթարկելու, ինչպես նաև խոշտանգումների զոհերի աջակցման անհրաժեշտության մասին: Վերոնշյալ կառույցների ղեկավարներին կփոխանցվեն առաջարկություններ` ուղղված խոշտանգումների կանխարգելմանը:

Նույն օրը` ժամը 18.30-ին, Հյուսիսային պողոտայի և Պուշկինի փողոցի հատման տարածքում տեղի կունենա «Խոշտանգումը հանցագործություն է» ֆլեշմոբ ակցիա, որի նպատակն է գրավել հանրային ուշադրությունն իրավապահ մարմինների աշխատակիցների կողմից խոշտանգումների կիրառմանը: