Կառավարությունը կդիմի՞ ոստիկանություն եւ դատախազություն

ԱԺ արտահերթ նիստում շարունակվում են Վերահսկիչ պալատի՝ 2012 թվականի տարեկան հաշվետվության քննարկումները:

ԱԺ ՀՅԴ խմբակցության պատգամավոր Արծվիկ Մինասյանը փոխվարչապետ Արմեն Գեւորգյանից հետաքրքրվեց` ՎՊ բացահայտած չարաշահումների հարցով` պաշտոնեական լիազորությունների չարաշահում, վարկային ռեսուրսների ոչ նպատակային օգտագործում, կառավարությունը մտադի՞ր է դիմել ոստիկանություն եւ գլխավոր դատախազություն:

Փոխվարչապետը նախ հայտարարեց, որ էկոնոմիկայի նախարարության հետ քննարկել են վարկային միջոցների անարդյունավետ ծախսի հարցը, սակայն ՎՊ արձանագրած այդ խնդիրները քրեաիրավական հետևանքներ չեն առաջացնում:

ՀՅԴ-ական պատգամավորը օրինակ բերեց՝  ՓՄՁ-ներին աջակցության ծրագիրը, որն, ըստ ՎՊ ստուգումների, իրականացվել է խախտումներով, շատ դեպքերում վարկերը նպատակին չեն ծառայել: «Քրեական օրենսգրքի 191 հոդվածը խոսում է հենց դրա մասին: Եթե չեք դիմել, այդ դեպքում պետք է մեղադրանք ներկայացնեք Վերահսկիչ պալատին»,- նշեց Մինասյանը:

Փոխվարչապետն ի պատասխան հայտարարեց, որ եթե այդ համատեքստում է հարցը քննարկվում, ինքը նման քննարկումների կառավարությունում չի մասնակցել: