Ձեռքի ամեն մի շարժում չի, որ վարժություն ա. ՄԱՊ-ի Ալիկ

Մայիսի 12-ին Արմավիրի մարզում տեղացած ուժգին կարկուտը մեծամասնական ընտրակարգով ընտրված ՀՀԿ-ական պատգամավոր Ալեքսան Պետրոսյանին ստիպեց խոսել այնքան, որքան չէր խոսել վերջին տարիներին: Սա չէր կարող վրիպել լրագրողների աչքից, եւ այսօր ԱԺ-ում լրագրողները ՄԱՊ-ի Ալիկից հետաքրքրվեցին` արդյո՞ք պետք է կարկուտը գար, որ խոսեր, գործեր:

« Ես խոսում եմ այնտեղ, որտեղ իմ խոսալով կարող եմ օգուտ բերել մեր երկրի տնտեսությանն ու գյուղացուն, այսինքն ձեռքի ամեն մի շարժում չի, որ վարժություն ա: Եթե մարդը կարա ժամերով խոսի, դա չի նշանակում, որ ինքը լավ խոսում ա... Արդյունքն ա կարևոր»,- հայտարարեց պատգամավորը:

Նա նշեց, որ կարկուտից հետո պետք էր կանգնել գյուղացու կողքին: «Խոսքն այս խոսելու մասին է, ոչ թե` ցույց տաս, թե դու լեզու, բերան ունես ու կարաս առավոտից իրկուն ճարտար լեզվով մարդ խաբես»,- ասաց նա:

Նշենք, որ պատգամավորի նախաձեռնությամբ ստեղծվել է Բնական աղետներից տուժած գյուղացիների օգնության հիմնադրամ, որն արդեն հավաքվել է շուրջ 36 մլն դրամ: