Հենրիխ Մխիթարյանը ներողություն է խնդրել խաղընկերներից

Հայաստանի ազգային հավաքականի և Դոնեցկի «Շախտյոր»-ի կիսապաշտպան Հենրիխ Մխիթարյանն  ՀՖՖ պաշտոնական կայքի հետ զրույցում խոսել է հավաքականում տիրող մթնոլորտի  մասին և անդրադարձել  Հայաստան-Չեխիա հանդիպման ավարտից հետո իր արած արտահայտությանը:

«Ոչ մի լարվածություն չկա: Ես տաքարյուն, զգացմունքային մարդ եմ: Իմ խաղընկերները գիտեն: Ես, օգտվելով առիթից, ուզում եմ ներողություն խնդրել թե' իմ բոլոր խաղընկերներից, թե' մեր ֆուտբոլի բոլոր երկրպագուներից: Դրանք զգացմունքային արտահայտություններ էին, որ լարվածությամբ էին թելադրված: Մեր ազգային հավաքականում, ինչպես միշտ, շատ լավ մթնոլորտ է, շատ լավ, ընկերական հարաբերություններ են: Իհարկե, կան մարդիկ, ովքեր շատ կցանկանան, որ հավաքականում անառողջ մթնոլորտ լինի, բայց ես պետք է այդ տեսակ մարդկանց տխրեցնեմ: Մեր ազգային հավաքականը մի ընտանիք է: Լավ ընտանիք: Մենք բոլորս մի նպատակի համար ենք հավաքվում միշտ՝ հաղթելու, եւ այս անգամ էլ ամեն ինչ անելու ենք, որ հաղթենք եւ ուրախություն պարգեւենք մեր երկրպագուներին»,- ասել է ֆուտբոլիստը:

Հիշեցնենք, որ Հայաստան-Չեխիա հանդիպումից հետո Մխիթարյանը մեղադրել էր որոշ ֆուտբոլիստների հավաքականում ջանք և եռանդ չներդնելու  համար: