Օֆշորների հարցում Քոքոբելյանը հակված է հավատալ լրատվամիջոցին

«Ովքեր են Փայլակ Հայրապետյանի ունեզրկման հեղինակները. օֆշորային եռյակը» հոդվածում «Հետքը» տեղեկացրել էր, որ Կիպրոսում գրանցված «WLISPERA HOLDINGS LIMITED» օֆշորային ընկերության բաժնետերերից մեկը ՀՀ վարչապետ Տիգրան Սարգսյանն է:

Այսօր ԱԺ-ում լրագրողների հետ հանդիպման ժամանակ անդրադառնալով խնդրին` անկախ պատգամավոր Խաչատուր Քոքոբելյանը նշեց, որ սա այն խնդիրը չէ, որին մատերի արանքով նայի թե' իշխանությունը, թե' դատախազությունը, թե' վարչապետը եւ թե' այն լրատվամիջոցը, որը հրապարակել է տեղեկատվությունը, քանի որ խնդիրն առնչվում է պետականությանը:

«Ես չեմ պատրաստվում որեւէ մեկնաբանություն անել, քանի որ խնդիրը քննության փուլում պետք է լինի: Հակված էլ չեմ մեղադրել որեւէ կողմի, քանի դեռ վերջնական որոշումը չկա: Անկեղծ ասած` սա այն խնդիրը չէ, որը հենց այնպես պետք է անցնի»,- նշեց Քոքոբելյանը:

Yerkir.am-ի դիտարկմանը, թե մտավախություն չունի՞, որ  հարցը կոծկելու փորձ կարվի, պատգամավորն արձագանքեց, որ, բնականաբար, կոծկելու հնարավորություն միշտ ունեցել է իշխանությունը: «Եթե ավելի հստակ ասեմ` չեմ կարծում, որ այդ լրատվամիջոցը հենց այնպես, առանց որեւէ հիմքի նման փաստաթուղթ հրապարակեր: Հակված չեմ կարծելու, որ, մատից հոտ քաշելով, նման փաստաթուղթ կհրապարակեին»,- ասաց Քոքոբելյանը: