Արծվիկ Մինասյանը` գազի թանկացման մասին

Հայաստանի էներգետիկ կյանքը կախված է Ռուսաստանից: Եթե ՀՀ իշխանությունները վճռականորեն գործեին, ամեն ինչ այլ կերպ կլիներ: Այս մասին լրագրողների հետ հանդիպման ժամանակ հայտարարեց ԱԺ ՀՅԴ խմբակցության պատգամավոր Արծվիկ Մինասյանը:

«Էներգետիկ անկախության մասին են խոսում, բայց ոչ մի քայլ չեն անում այդ անկախությունն ապահովելու համար»,- ասաց նա:

Անդրադառնալով գազի հնարավոր թանկացմանը` Մինասյանն ասաց. «Ո՞վ է ասում, որ գազի գինը Հայաստանում ցածր է, հակառակը` գազն ավելի թանկ է, քան Վրաստանում: Անգամ եվրոպական երկրների հետ ենք համեմատել, և ստացվում է` մեզ մոտ գազը թանկ է: Իրան- Հայաստան գազամուղը չպետք է հանձնվեր ՌԴ-ին: Այլընտրանքային էներգիայի աղբյուրները պետք է կարևորվեին, բայց դա չի արվում»:

Նա, միաժամանակ, նշեց, որ ինքը բնավ մտադիր չէ հակառուսական տրամադրություն սերմանել, այլ պարզապես մարդկանց դրդում է արժանապատվություն ունենալ: «Ռուաստանն այս քաղաքականությամբ հայաթափում է Հայաստանը»,- հայտարարեց նա:

Պատգամավորը, այսօրվա իշխանություններին համարելով ամենաթույլիկը, նշեց, որ նրանք պետք է համարժեք գործողություններ իրականացնեն: