ՏԵՍԱՆՅՈՒԹ. «Գազպրոմ Արմենիան» բակի կրպակ չէ. տնտեսագետը՝ գազի թանկացման մասին

Գազի՝ 30 տոկոսով թանկացման մասին լուրի արտահոսքով ռուսական կողմը  նպատակ ունի շոշափել հայ հանրության տրամադրություններն ու հայկական կողմի բանակցությունների տակտիկան՝ բարձրացնելու կամ չբարձրացնելու դեպքում. Yerkir.am-ի հետ հարցազրույցում ասաց տնտեսագետ, ՀՅԴ Բյուրոյի տնտեսական հետազոտությունների գրասենյակի պատասխանատու Սուրեն Պարսյանը:

Նրա դիտարկմամբ՝ սա առևտրային բանակցություններում կիրառվող գործիքներ են, որոնց ի պատասխան` հայկական կողմը «լուռումունջ նստած է», քանի որ չունի էներգետիկ քաղաքականություն և կոմպետենտ թիմ: Տնտեսագետը կանխատեսում է՝ հետևանքն այն կլինի, որ տարեվերջին հապշտապ կկնքվի մի պայմանագիր, ինչ արվեց անցյալ տարվա դեկտեմբերին:

Տնտեսագետը նշում է, որ 30 տոկոսով թանկացման մասին արտահոսքը պատահական չէր նաև այն առումով, որ ռուսական կողմը ոչ միայն Հայաստանի համար է նախատեսում բարձրացնել գազի գինը, այլև մյուս գործընկերների հետ է բանակցում այս ուղղությամբ: «Բելառուսի դեպքում ևս զգալի տեղաշարժեր կան, և բելառուսական կողմը, կարծես, չի կարողանա պահել իր 125 դոլար՝ 1000 խմ հաշվով սակագինը, քանի որ մերժել  է ռուսական կողմի՝ իր տարածքում ռազմաբազա ստեղծելու ծրագիրը»,- ասաց նա:    

Հայաստանում, ըստ նախկինում  հաստատված տեղեկատվության, ձևավորվել էր խումբ, որը պետք է բանակցեր ՌԴ-ի հետ՝ գազի երկարաժամկետ գին սահմանելու մասին: Սուրեն Պարսյանի համար հստակ է, որ որևիցե նախնական պայմանավորվածություն, ձեռքբերում չունենք. «Հայկական և ռուսական կողմերը չեն խոսում արդյունքների մասին, այլ  տարբեր աղբյուրներից տեղի են ունենում տեղեկատվության արտահոսքեր՝ ըստ էության նպատակ ունենալով ճշտել ազգաբնակչության հնարավոր արձագանքները, տեսակետները»:

Անդրադառնալով 2019 թ. հունվարի 1-ից սահմանի վրա 15 դոլարով գազի գնի բարձրացմանը` տնտեսագետն ընդգծեց, որ այդ բարձրացումը որևիցե ձևով չանդրադարձավ գազի սակագնի վրա, բայց նաև տեղի չունեցավ  «Գազպրոմ Արմենիա»-ի խնայողությունների կամ աշխատողների թվի կրճատման հաշվին:  

««Գազպրոմ Արմենիա» ընկերությունը չի կրճատել իր աշխատողների թվաքանակը և «Գազպրոմ Արմենիա» ընկերությունը չունի խնայողություններ: Ավելին` վերջին 3-4 տարիներին ինքն անընդհատ վնաս է կուտակել և չունի շահույթ»,- արձանագրեց տնտեսագետը:

Սուրեն Պարսյանի համոզմամբ` այս տարվա ընթացքում 15 դոլարի բարձրացումը ուղղակի ձևավորվել է որպես պարտք այդ ընկերության համար, և տարվա վերջին այդ պարտքը կկազմի 30 միլիոն դոլար, այսինքն` «Գազպրոմ Արմենիա» ընկերության պարտքը 30 միլիոնով կավելանա, ինչը լուրջ մտահոգություն է մեր գազամատակարարման համակարգի համար:

««Գազպրոմ Արմենիա»-ն բակի կրպակ չէ, որի սնանկացումը որևիցե ազդեցություն չունենա տնտեսության վրա, սա լուրջ ռազմավարական, բնական մոնոպոլիա է ու պետք է գործի առողջ, արդյունավետ, և հետագայում մենք պետք է գտնենք լուծումներ: Այսինքն` ուղղակի և անուղղակի եղանակով այդ գումարը վճարելու է հայ սպառողը, դա տեղի կունենա սուբսիդավորման միջոցով, գազի սակագնի բարձրացման միջոցով և այլն: Նաև կանխատեսելի է, որ եթե այս տարվա ընթացքում բարձրանա գազի սակագինը ևս որոշակի տոկոսով, ապա նոր հաշվարկների ժամանակ միանշանակ հաշվի է առնվելու նաև այս տարվա հունվարի 1-ի բարձրացումը. սա, անշուշտ, չի կարող անտեսվել «Գազպրոմ Արմենիա» ընկերության դեպքում, քանի որ նրա համար սա պարտք է: Այսինքն` 15 դոլարը և հետագա հնարավոր բարձրացումը ևս անմիջականորեն կդրվեն   գազի սակագնի վրա, և հայ սպառողը կվճարի ոչ միայն այդ պարտքը, այլև դրա տույժերը»,-մտահոգություն հայտնեց Սուրեն Պարսյանը:

Առավել մանրամասն՝ տեսանյութում.