ԲՀԿ-ՀՅԴ-ՀԱԿ համագործակցության մեջ սեպ խրելու` իշխանության փորձերն անօգուտ են

ԱԺ ավանդական ճեպազրույցում Երեւանի ավագանու ընտրությունների քարոզարշավը ԱԺ ԲՀԿ խմբակցության քարտուղար Նաիրա Զոհրաբյանը արդյունավետ գնահատեց եւ նշեց, որ ուղերձները, որ ուզում էին հասցնել երևանցուն, հաջողվել է հասցնել:

ԲՀԿ-ի շանսերը ընտրություններում Զոհրաբյանը բարձր գնահատեցԼ Ըստ նրա` եթե ընտրությունները լինեն ազատ եւ արդար, ԲՀԿ-ն մեծամասնություն կունենա: Զոհրաբյանը շատ հավանական համարեց նաեւ ընտրություններից հետո ընդդիմության հետ հետընտրական դաշինքի ձեւավորումը, մասնավորապես` ՀԱԿ-ի եւ ՀՅԴ-ի: Պատգամավորը նշեց, որ իր համար դեռևս հասկանալի չէ «Ժառանգություն» կուսակցության օրակարգը, սակայն հույս ունի, որ ընտրություններից հետո համագործակցության եզրեր կգտնվեն:

Անդրադառնալով նախօրեին ԲՀԿ հանրահավաքից հետո տարածված լուրերին, թե ԲՀԿ-ն իր համակիրներին է բերել, գումար տվել եւ այլն, ԲՀԿ խմբակցության քարտուղարը նշեց, որ իրենց համար այս խոսակցությունները կանխատեսելի էին: «Մեզ համար կանխատեսելի էին բոլոր հակաքարոզչական սցենարները, բայց որևէ արտառոց բան չի եղել: Բնական է, մեր ակտիվիստները հագել են ԲՀԿ շապիկները, ի՞նչն է զարմանալի»,- ասաց Զոհրաբյանը:  Նա նաեւ նշեց, որ իշխանության բոլոր փորձերը` սեպ խրել ԲՀԿ-ՀԱԿ-ՀՅԴ համագործակցության մեջ, չեն հաջողի: