Ադրբեջանում ոստիկանությունը ցրել է ընդդիմության նիստը

Ադրբեջանական Շեքի քաղաքում ոստիկանությունը  թույլ չի տվել ընդդիմադիր «Մուսավաթ» եւ «Ժողովրդական ճակատ» կուսակցությունների տեղի կառույցներին համատեղ նիստ անցկացնել:

«Ժողովրդական ճակատ»-ի ներկայացուցիչ Ալի Աբդուլաեւը Turan-ին տեղեկացրել է, որ ոստիկանները նիստի մասնակիցներից պահանջել են ցրվել: Դիմակայությունից խուսափելու համար հանդիպումը դադարեցվել է: «Դուրս գալով շենքից` մենք տեսանք, որ գրասենյակը շրջապատված է ոստիկաններով, եւ ոչ հեռու եւս 30 մարդ է կանգնած, որոնց գլխավորում էր գործադիր իշխանության նախկին ներկայացուցիչը»,- պատմել է Աբդուլաեւը:

Ի դեպ, երեկ արգելվել են նաեւ ընդդիմադիր կուսակցությունների հավաքները Նախիջեւանում, Լենքորանում, Սաբիրաբադում: