4 համերգ` ″Վերածնունդի″ շրջանակներում

Առաջիկայում «Վերածնունդ» միջազգային 5-րդ մրցույթ-փառատոնի շրջանակներում Երեւանում կկայանա 4 համերգ: Այս տարի մրցույթ-փառատոնը նվիրված է Արամ Խաչատրյանի ծննդյան 110-ամյակին: Մասնակցում է 2415 երաժիշտ-կատարող աշխարհի 30 երկրներից: Մրցույթն անցկացվում է 13 անվանակարգում` 5 տարիքային խմբերով:

Փառատոնի մամլո ծառայությունից տեղեկացնում են, որ երկու համերգները տեղի կունենան Կոմիտասի անվան կամերային երաժշտության տանը. ապրիլի 13-ին դաշնամուրային դուետով կներկայանան լատվիացի Անտրա եւ Նորմունդս Վիկսնեները: Այդ օրը նաեւ ելույթով հանդես կգա ավստրիացի թավջութակահար Վիկտոր Միլոսերդովը:  Ապրիլի 15-ին Հայաստանի պետական երիտասարդական նվագախմբի հետ ելույթ կունենա կլարնետահար Իգոր Ֆյոդորովը (Ռուսաստան):

Ապրիլի 16-ին եւ 17-ին կայանալիք համերգները կլինեն Արամ Խաչատրյանի տուն-թանգարանում. ապրիլի 16-ին ելույթ կունենան տենոր Վահրամ Թադեւոսյանը եւ դաշնակահար Միխայիլ Արկադեւը (Ռուսաստան), իսկ ապրիլի 17-ին` ջութակահար Կարեն Շահգալդյանը եւ դաշնակահար Յուրա Մարգուլիսը (ԱՄՆ):