Սահակաշվիլին հնարավոր է հարցաքննության կանչվի 2008-ի դեպքերի կապակցությամբ

Վրաստանի արդարադատության նախարար Թեա Ցուլուկիանին չի բացառում, որ 2008 թվականի օգոստոսին կատարված իրադարձությունների հետաքննության շրջանակներում հարցաքննվի նաեւ նախագահ Միխեիլ Սահակաշվիլին: Այսօր, ըստ Интерфакс-ի, նախարարը լրագրողներին հայտնել է, որ այն ժամանակ, երբ բարձրանա Սահակաշվիլիի հարցաքննելու հարցը, նա այլեւս նախագահ չի լինի:

Ցուլուկիանին հայտարարել է, որ այդ հետաքննությունը Վրաստանի միջազգային պարտավորությունն է: «Հաագայի դատարանի դատախազը շատ տեղեկություններ է ստացել, որոնցում բողոքներ են ոչ կառավարական կազմակերպություններից: Դրանք պնդում են, որ օգոստոսյան պատերազմի ժամանակ տարբեր ազգությունների ներկայացուցիչների եւ պաշտոնյաների կողմից մարդկության նկատմամբ հանցագործություններ են կատարվել»,- նշել է նա:

Նախարարի խոսքերով` Վրաստանը պետք է ինքնուրույն հետաքննի այդ հանցագործությունները եւ գործը չհասցնի միջազգային դատարան: