Ինչու էր Սահակաշվիլին 2008-ին փողկապը ծամել

Վրաստանի նախկին նախագահ, Օդեսայի նախկին նահանգապետ Միխայիլ Սահակաշվիլին Гордон պարբերականին տված հարցազրույցում պատմել է, որ 2008-ին, երբ հեռախոսազրույցի ժամանակ ծամել է փողկապը, չի իմացել որ իրեն նկարահանում են:

«Ես չգիտեի, որ ուղիղ եթերում եմ: Իսկ երբ մարդը միայնակ է մնում, հատկապես՝ նման իրավիճակում, ինչպես  դուք ասացիք, կարող է անել ցանկացած բան: Այդ սովորությունն ինձ մոտ մնացել է դեռ «Արտեկ» պիոներական ճամբարից: Արդեն այնտեղ ես  անտարբեր չէի փողկապի նկատմամբ: Այդ պատճառով, ինչպես  տեսնում եք, ես դրանք չեմ կրում: Ես այժմ դիետա եմ պահում, ցանկանում եմ նիհարել: Դուք մտածում եք` ինչպես եմ այդքան նիհարել: Քանի որ հրաժարվել եմ փողկապներից»,-ասել է նա:

Հիշեցնենք, որ ռուս-վրացական պատերազմը  տեղի է ունեցել 2008 թվականի օգոստոսին՝ տևելով հինգ օր: Հենց այդ օրերին էր տեղի ունեցել  վերոհիշյալ դեպքը: