ԱՄՆ-ում 25 աշակերտի ձեռքից սնունդ են խլել

ԱՄՆ դպրոցներից մեկի աշխատակիցները երեխաների ձեռքից վերցրել են ճաշը, քանի որ դրա համար չի վճարվել: Երեխաների ծնողները պահանջում են դպրոցի ողջ անձնակազմին պատասխանատվության ենթարկել:

Դեպքը պատահել է Մասաչուսեթս նահանգի Էթլբորո քաղաքի դպրոցներից մեկում: Աշխատակիցների նման դաժան վերաբերմունքին է արժանացել 25 աշակերտ. գրում է The Sun Chronicle-ը:

Հայտնի է դարձել, որ երեխաների ճաշի համար սնունդ մատակարարող Whitson’s ընկերությունը որոշել է այլևս սնունդ չբերել այն երեխաների համար, ովքեր չեն կարողացել վճարել դրա դիմաց: Երեխաների մոտ գումար չի եղել, իսկ դպրոցի էլեկտրոնային հաշվի վրա բավարար գումարը չի եղել: Դպրոցի աշխատակիցները ստիպել են երեխաներին իրենց մատուցարանում դրված սնունդը թափել:

Երեխաներին ոչ միայն նվաստացրել, այլև ֆիզիկապես վատ վիճակում են դրել. նրանք սովից թուլացել են:

Դպրոցի ղեկավարությունը հայտնել է, որ այս արարքի հեղինակներից մեկն արդեն հեռացվել է աշխատանքից, իսկ սնունդ մատակարարող ընկերությանը զգուշացրել են, որ այլևս նման բաներ թույլ չտա:

Բանն այն է, որ ճաշի համար վճարել չկարողացող երեխաներին կաթն ու սենդվիչները տրվում են անվճար: