Սատկած շունն էլ է մարդու ընկերը

41-ամյա Սյուզան Լի Կրաուսը երկու տարի աշխատել է Ֆլորիդայի անասնաբուժական կլինիկայում: Այս ընթացքում խորամանկ կինը դեղատոմսեր է գողացել կլինիկայից, և դրանց միջոցով կարողացել է դեղեր գնել իր շան համար, որն արդեն 10 ամիս առաջ սատկել էր:

Կեղծ դեղատոմսերի միջոցով կինը կարողացել հավաքել հիդրոկոդոնի և ացետամինոֆենի 240 հաբ:  The Huffington Post-ը հաղորդում է, որ Սյուզան Լի Կրաուսին երկու օր առաջ ձերբակալել են:

Ոստիկանները հետաքննություն են սկսել միայն այն բանից հետո, երբ դեղատնից կլինիկա են զանգել` դեղատոմսը ճշտելու համար: Իսկ բժիշկը հայտնել է, որ դեղատոմսերը կեղծ են:

Ոստիկանությունում Սյուզանն ասել է, թե ինքը ցավազրկողների կարիք է ունեցել, սակայն չի կարողացել գնել, քանի որ ապահովագրություն չի ունեցել:

Սյուզանին մեղադրանք է առաջադրվել մանր գողություն կատարելու, խաբեությամբ դեղամիջոցներ ձեռք բերելու և կեղծարարության համար: