Թուրքիան մասնակից է արյունահեղությանը Սիրիայում. Բաշար Ասադ

Սիրիայի նախագահ Բաշար Ասադը այսօր Թուրքիայի կառավարությանը մեղադրել է «Սիրիայում արյունահեղությանը մասնակից լինելու» մեջ: Ըստ նրա` Թուրքիայի վարչապետ Էրդողանը «ճգնաժամի սկզբից ի վեր ոչ մի ճշմարիտ խոսք չի ասել», Թուրքիայի կառավարությունը «ներքաշված է դավադրության» մեջ:

Ասադի` թուրք լրագրողներին տված հարցազրույցից մեջբերումներ տեղադրված են Սիրիայի նախագահի պաշտոնական կայքում. տեղեկացնում է ИТАР-ТАСС-ը:

Դրանցից մեկում Սիրիայի նախագահը անդրադարձ է կատարում մահմեդական հայտնի աստվածաբան Մուհամեդ ալ Բուտի սպանությանը` մարտի 21-ին Դամասկոսի մզկիթում տեղի ունեցած պայթյունին: «Հոգեւոր առաջնորդները, ինչպիսին ալ Բուտն էր, կարեւոր դերակատարություն ունեին  Սիրիայում եղբայրասպան պատերազմի հրահրմանն ուղղված դավադրության տապալման գործում, այդ պատճառով էլ սպանում են նրանց»,- հայտարարել է Ասադը: Նա հիշեցրել է, որ մարտի 30-ին զինված ծայրահեղականների կողմից սպանվել էր իշխանությունների նկատմամբ հանդուրժող դիրքորոշում ունեցող մեկ այլ մահմեդական գործիչ` շեյխ Հասան Սաֆիեդդինը: