Գուրգեն Մարգարյանի մայրը կսփոփվի հայ ռազմագերիների վերադարձով

Բուդապեշտում սպանված հայ սպա Գուրգեն Մարգարյանի ընտանիքի և մահափորձի ենթարկված Հայկ Մակուչյանի ներկայացուցիչների կողմից Ադրբեջանի և Հունգարիայի դեմ  անհատական գանգատը Եվրադատարանը կստանա տասնօրյա ժակետում: Այս մասին լրագրողների հետ հանդիպման ժամանակ հայտարարեց «Իրավունքների պաշտպանություն առանց սահմանների» ՀԿ-ի նախագահ, փաստաբան, Եվրադատարանում Գուրգեն Մարգարյանի ընտանիքի և Հայկ Մակուչյանի շահերի ներկայացուցիչ Սիրանուշ Սահակյանը:

Եվրադատարանում, որպես կանոն, գործերը քննվում են 2-4 տարվա ընթացքում, սակայն, ինչպես նշեց Սահակյանը, հնարավոր է այս գործը Եվրադատարանը համարի առաջնահերթ և արագացված դատաքննություն իրականացնի: Ըստ փաստաբանի` արագացված դատաքննության վերաբերյալ հստակ ժամկետներ հնարավոր չէ ներկայացնել, քանի որ դա կախված է Եվրադատարանի ծանրաբեռնվածությունից:

Փաստաբանը հույս հայտնեց, որ այս գործի վերաբերյալ դատարանի գնահատականը սուր կլինի, միաժամանակ նշեց, որ այն մեծ արժեք կունենա  մարդու իրավունքների ստանդարտների զարգացման գործում:

Սահակյանի խոսքով` Մարգարյանի ընտանիքի անդամները հրաժարվել են նյութական եւ բարոյական հատուցումից, քանի որ ոչինչ չի կարող զավակի կորուստը լրացնել: «Գուրգեն Մարգարյանի մոր սրտի մղումն էր, որպես սփոփանք, դատական հայցում ներառել հայազգի ռազմագերիների ազատ արձակման պահանջը»,- ասաց փաստաբանը և հավելեց, որ, գործի առանձնահատկություններից ելնելով, այն իրատեսական չէ: «Իրատեսական է Սաֆարովի դուրս բերումը Ադրբեջանից, ինչը և հայկական կողմը ակնկալում է»,- ասաց նա:

Հիշեցնենք, որ  գործը Մարդու իրավունքների եվրոպական դատարան էր ներկայացվել փետրվարի 28-ին: