ՀՀ-ում սուր շնչառական վարակները գլուխ են բարձրացրել

ՀՀ առողջապահության նախարարության կողմից իրականացվող մշտադիտարկման արդյունքներով` վերջին շաբաթվա ընթացքում հանրապետությունում արձանագրվել է սուր շնչառական վարակների աճման միտում. yerkir.am-ի հետ զրույցում նշեց ՀՀ ԱՆ պետական հիգիենիկ եւ հակահամաճարակային տեսչության գլխավոր մասնագետ Լիանա Թորոսյանը:

Մշտադիտարկման արդյունքների համաձայն` վարակների աճման միտումը պայմանավորված է առողջության առաջնային պահպանման կազմակերպություններ բնակչության ակտիվ դիմելիությամբ և գրիպի ու սուր շնչառական վարակների ներկայիս սեզոնային օրինաչափությամբ։

«Բնակչության ակտիվ դիմելիությունը գրիպի հետագա բարդությունների առաջացման կանխարգելման կարևոր պայման է, որը միաժամանակ նվազեցնում է ստացիոնար բուժհաստատությունների բեռը: Հանրապետության, հատկապես` Երևանի հիվանդանոցների բաժանմունքներում բուժվող հիվանդների մոտ համապատասխան բուժման արդյունքում առողջացման դրական շարժընթաց է նկատվում: Բաժանմունքներում բուժվող միջին ծանրությամբ հիվանդների վիճակը պայմանավորված է նրանց ուղեկցող հիվանդություններով և ուշ դիմելիությամբ»,-ասաց տիկին Թորոսյանը եւ հավելեց, որ հոսպիտալացված հիվանդների շրջանում կազմակերպված և իրականացված վիրուսաբանական հետազոտության արդյունքում արձանագրվել են գրիպի ինչպես Ա տեսակի H1N1, H2N3 ենթատեսակները, այնպես էլ Բ տեսակը:

Ըստ Թորոսյանի` ինչպես ցույց են տալիս համաճարակաբանական վերլուծության արդյունքները, գրիպից բարդություններ կարող են առաջանալ գրիպի ցանկացած տեսակի, ցանկացած ենթատեսակի ժամանակ, հատկապես` խոցելի անձանց շրջանում` քրոնիկ հիվանդություններով տառապող անձինք (սիրտ թոքային անբավարարություն, երիկամային հիվանդություն, շաքարային դիաբետ, ասթմա), տարեցներ, երեխաներ, հղի կանայք:

Մասնագետը նշեց, որ գրիպի, սուր շնչառական վարակների և դրանց բարդություններից խուսափելու համար անհրաժեշտ է դիմել առողջության առաջնային պահպանման կազմակերպություններ` անհրաժեշտ բժշկական խորհրդատվություն, բուժում և բժշկական ցուցման դեպքում հակավիրուսային պատրաստուկներ անվճար ստանալու համար: