Թեկնածուների մի մասը ''գործարքաբան'' է աշխատում. Ստեփան Սաֆարյան

Արդեն տեղեկացրել ենք, որ նախագահի թեկնածու Պարույր Հայրիկյանը ՍԴ-ից հետ է վերցրել երեկ տված իր  դիմումը` ընտրությունները երկու շաբաթով հետաձգելու պահանջով: Թե ինչո՞ւ է դիմել այս քայլին, Հայրիկյանը դեռեւս որեւէ լուրջ, հիմնավորված պատասխան չի տվել: Ուշագրավ է, որ երեկ նա ասում էր, որ դիմումը կվերցնի միայն այն դեպքում, եթե ձեւավորվի միասնական թեկնածու, ինչն, ըստ էության, չեղավ եւ դժվար էլ լինի:

Yerkir.am-ի հետ զրույցում «Ժառանգություն» կուսակցության վարչության փոխնախագահ Ստեփան Սաֆարյանը հայտարարեց, որ ՍԴ դիմել-չդիմելու, դիմումը տալու, այնուհետեւ հետ վերցնելու ամբողջ գործընթացն իր համար անհասկանալի է:

«Անհասկանալի է, թե ինչ են անում, ինչի համար են անում եւ ինչ հիմնավորմամբ են անում: Մի օր դիմում տալ, մի օր վերցնել... Ցավում եմ, իհարկե, բայց, անկեղծ ասած, այս ամենը լուրջ չէ»,- նշեց նա:

Դիտարկմանը, որ, ըստ նախագահի թեկնածու Արման Մելիքյանի` Հայրկյանի կողմից ՍԴ դիմել-չդիմելը քաղաքական առեւտուր է, Սաֆարյանը պատասխանեց. «Մեր թեկնածուների մի մասը լավ «գործարքաբան» է աշխատում. «պարզում են», թե ով ում հետ է գործարքի մեջ: Ես չեմ ուզում նրանց հացը կտրել, բայց մի բան կարող եմ ասել, որ պարզապես անհասկանալի իրավիճակ է ստեղծվել»:

Հարցին` Րաֆֆի Հովհաննիսյանը կզիջի՞ դիրքերը հանուն միասնական թեկնածուի, Ստեփան Սաֆարյանը պատասխանեց, որ այդ հարցն իրեն չպետք է ուղղենք: