Սահակաշվիլին պատասխանել է նաեւ Ռուսաստանի ջավախահայերին

Վրաստանի նախագահ Միխեիլ Սահակաշվիլին արձագանքել է Ռուսաստանի ջավախահայերի` հայաբնակ Սամցխե-Ջավախք նահանգն ազատ տնտեսական գոտի հայտարարելու պահանջին: apsny.ge լրատվական կայքում մեջբերված խոսքերից ակնհայտ է, որ Վրաստանի նախագահը մերժել է առաջարկը:

Ըստ Սահակաշվիլիի` թե' այս առաջարկի, թե' Վահագն Չախալյանի ազատ արձակման եւ թե' Վրաստանով Աբխազիայից Հայաստան անցնող երկաթուղային հաղորդակցության բացման հետեւում կանգնած է ՌԴ, եւ սրանցից ոչ մեկը Վրաստանի շահերից չի բխում:

Այն, որ Սամցխե-Ջավախք նահանգն ազատ տնտեսական գոտի ճանաչելը Ռուսաստանի ծրագրի մի մասն է, նախագահը բացատրում է նրանով, որ այդ առաջարկն արել են ոչ թե ՀՀ կառավարությունը, նրա քաղաքացիները կամ Վրաստանում բնակվող հայերը, այլ Ռուսաստանի ջավախահայերը:

«Ազատ տնտեսական գոտի ստեղծելու գաղափարի նպատակն այն է, որ ստեղծվի մեկ միասնական վարչական միավոր, իսկ բավական է, որ դա ստեղծվի, առաջ կքաշվի ինքնավարության, ապա նաեւ Վրաստանից անկախանալու պահանջը»,- հայտարարել է Սահակաշվիլին: