Բարձրաստիճան պաշտոնյաների տղաները հույսները կտրել դատավոր դառնալու հեռանկարից. ''Ժողովուրդ''

ՀՀ գլխավոր դատախազ Աղվան Հովսեփյանի որդին հրաժարվել է դատավոր դառնալու մտքից. գրում է «Ժողովուրդը»:

Համենայն դեպս, շարունակում է թերթը, հունվարի 17-ին տեղի ունեցած ՀՀ արդարադատության խորհրդի դռնփակ նիստում քննարկվել է դատավորի թեկնածու Նարեկ Աղվանի Հովսեփյանի դիմումը` դատավորների թեկնածությունների ցուցակից իրեն հանելու վերաբերյալ: Խորհուրդը որոշել է առաջարկով դիմել Սերժ Սարգսյանին, որպեսզի այդ ցուցակից Նարեկի անունը հանվի:

Նույն օրը ԱԽ-ն քննել է նաեւ ՀՀ Սահմանադրական դատարանի նախագահ Գագիկ Հարությունյանի որդու` Արտակ Գագիկի Հարությունյանի դիմումը` դարձյալ դատավորների թեկնածությունների ցուցակից իրեն հանելու վերաբերյալ:

Թե ինչու են ՀՀ բարձրաստիճան պաշտոնյաների տղաները հույսները կտրել դատավոր դառնալու հեռանկարից, «Ժողովուրդ»-ին առայժմ չի հաջողվել պարզել: Նրանք կա՛մ առավել գայթակղիչ առաջարկ են ստացել, կա՛մ քաղաքական իրավիճակը հուսադրող չէ. եզրակացնում է թերթը: