Աշխատանքի տեսչությունն անգործության է մատնված

Ամիսներ առաջ մամուլը գրել էր, որ Հրազդանի «Միկա ցեմենտ» գործարանի գլխավոր տնօրեն Նաիրա Մարտիրոսյանն առանց որեւէ բացատրության 35 բանվորի ազատել է աշխատանքից, որից հետո ազատված աշխատակիցներից շատերը դիմել էին աշխատանքային պետական տեսչության Կոտայքի մարզային ծառայության գրասենյակ՝ հայտնելով, որ ոտնահարվել են իրենց իրավունքները: Գրասենյակից ասել էին, որ պատասխանը կլինի 1 ամսից ոչ շուտ:

Ինչպես գրում է «Ժողովուրդ»-ը, աշխատանքային պետական տեսչության Կոտայքի մարզային ծառայությունը շարունակում է անգործություն ցուցաբերել: Ազատված բանվորներին պատասխանել են, թե տնօրենը դեռ արձակուրդի մեջ է, իսկ օգնականներին որեւէ կերպ հնարավոր չի եղել գտնել: «Մի խոսքով, պետությունը կանգնած է Միխաիլ Բաղդասարովի թիկունքին, իսկ քաղաքացիների իրավունքները երկրորդական արժեք են»,- գրում է թերթը: