Սերժ Սարգսյանը չի՞ խանդում ու ներելու մեծ հոգի՞ ունի

Լրագրողների հետ հանդիպման ժամանակ, ի պատասխան Yerkir.am-ի հարցի, ԱԺ ՀՀԿ խմբակցության պատգամավոր Համլետ Հարությունյանը հնարավոր համարեց, որ նախագահական ընտրություններից հետո ձեւավորվի նոր կոալիցիա կամ ազգային համաձայնության կառավարություն:

«Այն, որ նախագահը ներգրավելու է բոլոր կարող ուժերին երկրի կառավարման մեջ, ես դրանում կասկած չունեմ: Եթե մեկն ապացուցի, որ, իրոք, անհրաժեշտ է երկրին, գործող նախագահն այդ հարցում խանդի զգացում չունի: Ունենալով ներելու շատ մեծ-մեծ հոգի` կարողանում է ընդհանուր լեզու գտնել, եւ եթե տեսնում է, որ այդ մարդը կարող է երկրի համար մի բան անել, այդ մարդուն կներգրավի»,- հայտարարեց ՀՀԿ-ական պատգամավորը եւ ընդգծեց, որ առանց կոալիցիայի էլ հնարավոր է քաղաքական ուժերին ներգրավել կառավարման համակարգում:

Հարցին, թե ի՞նչ է կարծում վարչապետի փոփոխության մասին, ՀՀԿ-ական պատգամավորը պատասխանեց. «Նորմալ, կիրթ, գրագետ վարչապետ ունենք, ի՞նչ ա արել վարչապետը, ի՞նչ եք ուզում էդ վարչապետից` ընդհանրապես: Ով տեղից վեր ա կենում, ասում ա` վարչապետին փոխեք: Ես չեմ կարծում, որ էդ մարդը իր ամբողջ կեցվածքով արժանի լինի փոխվելուն»: