Սիրիահայ 20 բժիշկ արդեն աշխատանք ունի

Սիրիայից գաղթած բժիշկները հանդիպել են ՀՀ առողջապահության նախարար Դերենիկ Դումանյանի հետ: Քննարկման հիմնական թեման է եղել բժիշկների` աշխատանքի տեղավորման հարցը։ Հանդիպմանը ներկա են եղելգրեթե բոլորը` մոտ 50 բժիշկ, որոնցից 20-ն արդեն ապահովվել է աշխատանքով։

Հենց քննարկման ընթացքում բժիշկներից մեկը համաձայնել է աշխատել մոտակա մարզում։ Մի քանի ստոմատոլոգների և երկու դեղագետի ևս կոնկրետ աշխատանք է առաջարկվել։ Որոշ առաջատար մասնագետներ էլ ցանկություն են հայտնել զբաղվել նաև դասախոսական աշխատանքով` ինչպես Երևանի Մ. Հերացու անվան պետական բժշկական համալսարանում, այնպես էլ` ՀՀ առողջապահության նախարարության ենթակայության բժշկական քոլեջներում։

Նախարարը վստահեցրել է, որ հանդիպման ընթացքում բարձրացված հարցերին մոտ օրերս լուծում կտրվեն, և բոլոր մասնագետներին աշխատանք կառաջարկվի։ Այդ նպատակով նախարարը խոստացել է նաեւ բանակցել մասնավոր դեղարտադրողների հետ։

Ի դեպ, սիրիահայ բժիշկների խնդրանքով այսուհետ յուրաքանչյուր ամսվա առաջին շաբաթ օրը պարբերաբար հանդիպումներ կկազմակերպվեն նախարարի հետ։