ՀՀԿ-ի քվոտայով նախարար դարձած Ռոստոմյանը լռում է

Վերջին ժամանակներս ԱԺ հարցուպատասխանի ժամանակ հանրապետական` տակավին երիտասարդ որոշ պատգամավորներ, անդրադառնալով մեր երկրի մարզական իրադարձություններին, քննադատորեն են մոտենում սպորտի և երիտասարդության հարցերի նախարար Հրաչյա Ռոստոմյանի գործունեությանը: Նախարարի նկատմամբ նմանօրինակ «հակակրանքի»  դրսևորում էլ նկատվեց երեկ` ԱԺ ՀՀԿ խմբակցության պատգամավոր Սամվել Ֆարմանյանի ֆեյսբուքյան էջում:  Պատգամավորն իր  զայրույթն էր արտահայտել Հայաստանի 10 լավագույն մարզիկների  ընտության   կապակցությամբ՝  այն որակելով անարդար, և բնական համարել, որ, որպես ստեղծված իրավիճակից միանգամայն արժանապատիվ ելք, կարելի է ակնկալել ՀՀ սպորտի և երիտասարդության հարցերի նախարար Հրաչյա Ռոստոմյանի հրաժարականը: 

Հայտարարության առնչությամբ yerkir.am-ը մեկնաբանություն խնդրեց սպորտի և երիտասարդության հարցերի փոխնախարար Արսեն Քարամյանից:

«Ես կարծում եմ, որ այստեղ անձնավորված որևէ խնդիր չկա: Կոնկրետ խնդրի վերաբերյալ երկու տարբեր մարդկանց մոտեցումներ են: Ե'վ Ռոստոմյանը, և' Ֆարմանյանը բավականին հասուն մարդիկ են: Մենք այս հարցով  զրուցել ենք եւ նախարարը եւս կարծում է , որ եթե մեր գործունեության արդյունքում  հասարակության մոտ կա թյուրըմբռնում կամ դժգոհություն, ապա պատրաստ ենք այդ հարցերը քննարկել եւ        դրանց տալ լուծումներ:

Այսուհետ նախարարությունը լավագույն 10 մարզիկների ընտրության հարցում քայլեր  կձեռնարկի`  այն  արժանահավատ, թափանցիկ և հասարակության կողմից ընդունելի դարձնելու համար: Այդ ժամանակ կփարատվեն նաև մեր մյուս գործընկերների, այդ թվում` Ֆարմանյանի կասկածները»:

Yerkir.am-ի հարցին, թե ինչո՞ւ նախարարաը չի պատասխանում իր հասցեին հնչող մեղադրանքներին, փոխնախարարը պատասխանեց. «Մի' մոռացեք, որ Ռոստոմյանը  Հանրապետականի քվոտայով է նախարար դարձել, դա մի կողմից ուրախալի է. նշանակում է` ներկուսակցական ազատություն կա»: