Հրաչյա Ռոստոմյանը հանդիպել է հաշմանդամային սպորտը ներկայացնող ՀԿ-ների ներկայացուցիչների հետ

ՀՀ սպորտի և երիտասարդության հարցերի նախարար Հրաչյա Ռոստոմյանի նախաձեռնությամբ` Հայաստանում հաշմանդամային սպորտի հեռանկարներին նվիրված քննարկմանը մասնակցել են ոլորտը ներկայացնող շուրջ 10 հասարակական կազմակերպությունների ներկայացուցիչներ:

Նախարարը կոչ է արել բոլորին` լինել առավելագույնս անկեղծ և առաջ քաշել կոնկրետ առաջարկություններ հասարակության այդ խոցելի շերտի ներկայացուցիչների ներգրավվածությունը սպորտում ավելի նպատակային և արդյունավետ դարձնելու համար: 

Նրա խոսքերով` արդեն իսկ Կառավարություն է ներկայացվել Հաշմանդամային սպորտի զարգացման 2013-2017թթ. ծրագիրը, որտեղ ներառված են ոլորտին առնչվող բազմաթիվ խնդիրներ և տրված են դրանց լուծման ուղիները: «Մենք ակնկալում ենք ձեր՝ որպես հաշմանդամ մարզիկների խնդիրներով զբաղվող կազմակերպությունների ներկայացուցիչներ, ունենալ ակտիվ մասնակցություն այդ ծրագրի իրականացման գործընթացում»,- նշել է Հ. Ռոստոմյանը:

Նրա խոսքերով` կարևորը սպորտի մասսայականացումն է, և որքան հնարավոր է մեծ թվով հաշմանդամների մասնակցությունը սպորտային միջոցառումներում: 

Քննարկման ներկաները շնորհակալություն են հայտնել նախարարին հանդիպման համար և նշել, որ նմանատիպ միջոցառում առաջին անգամ է կազմակրեպվում հենց ոլորտի ղեկավարի կողմից: Նրանք հույս են հայտնել, որ պետական աջակցության շնորհիվ հնարավոր կլինի լուծել ոլորտում առկա բազմաթիվ խնդիրներ:

Հրաչյա Ռոստոմյանը հանձնարարել է նախարարության համապատասխան ստորաբաժանումներին սերտ համագործակցել հաշմանդամային սպորտի խնդիրներով զբաղվող կազմակերպությունների հետ, հավաքագրել նրանց բոլոր առաջարկությունները և հաջորդ շաբաթվա ընթացքում կազմակերպել նոր հանդիպում այդ առաջարկությունները քննարկելու և միջոցառումների ծրագիրը կազմելու համար: