Նախկին վարչապետին հարցաքննել են

Վրաստանի նախկին վարչապետ Նիկա Գիլաուրին շաբաթ օրը հարցաքննության է հրավիրվել Վրաստանի ՆԳՆ-ի հակակոռուպցիոն վարչություն: Ինչպես լրագրողներին հայտնել է Գիլաուրին, 6 ժամ տեւած հարցաքննության ընթացքում իրեն հարցեր են ուղղել «Կարթու» բանկի սննկացման գործով, որին ներգրավված է որպես  վկա:

Նախկին վարչապետն ասել է, որ ինքը զբաղվել է հիմնականում մակրոտնտեսական հարցերով եւ նման թեմաների հետ առնչություն չի ունեցել:

Նիկա Գիլաուրիի հարցաքննությանը նախորդել է Վրաստանի ֆինանսների նախկին նախարար Դմիտրի Գվինդաձեի հարցաքննությունը: Ուրբաթ օրն էլ հարցաքննվել էին էկոնոմիկայի եւ  կայուն զարգացման նախկին նախարար Վերա Կոբալիան եւ էներգետիկայի եւ ֆինանսների նախկին նախարար Ալեքսանդր Խեթագուրին: 

Ինչպես հայտնում է Интерфакс-ը, ըստ վրաց իրավապահների՝ մինչև հոկտեմբերի 1-ի ընտրությունները հանցավոր սխեմա է մտահղացվել, որի նպատակն է եղել հաշիվներ մաքրել ընտրություններում հաղթանակած ընդդիմադիր թեկնածու Բիձինա Իվանիշվիլիի հետ: