Ե՞րբ էինք դուրս եկել հին ու բարի ժամանակներից. Վահան Հովհաննեսյան

ԱԺ ՀՅԴ խմբակցության պատգամավոր Վահան Հովհաննեսյանը «Ժողովուրդի» հետ զրույցում ասել է, որ անթույլատրելի է համարում ԱԺ պատգամավորներ Լեւոն Զուրաբյանի եւ Վարդան Օսկանյանի զրույցի գաղտնալսումն ու հրապարակումը:

-Հաշվի առնելով Ձեր քաղաքական փորձառությունը` ի՞նչ եք կարծում` այդ երեւույթները պատահակա՞ն են, թե՞ ոչ, եւ գաղտնալսումը համապատասխան մարմիննե՞րն են արել, թե՞ ինչ-որ ֆիզիկական անձ:

-Կարելի է ենթադրել, որ գաղտնալսումներ կատարվում են, եւ կատարվում են հաճախ, ընդ որում` ոչ միայն նշված քաղաքական ուժերի ներկայացուցիչների նկատմամբ: Պարզապես այլ բան, թե ինչ է նշանակում գաղտնալսման հրապարակումը: Ես չգիտեմ` այդ գաղտնալսումները սկզբում որտեղ են հրապարակվել: Դա քննությունը պետք է պարզի: Բայց հրապարակումը ցույց է տալիս, որ դրանով ինչ-որ արդյունք են ուզում քաղել: Սակայն այսպես քաղած արդյունքը, կարծում եմ, ճիշտ տեղ չի տանում:

-Կատարվածը, Ձեր կարծիքով, ի՞նչ քաղաքական էֆեկտ կարող է տալ, ասենք` սրանով փորձում են այդ գործիչներին լռեցնե՞լ, թե՞ հասարակությանն ահաբեկել:

- Գաղտնալսումը հրապարակելով` պետք է փորձեն մթնոլորտ ստեղծել, որովհետեւ եթե այն օրինական ճանապարհով չի ստացված, դատարանում չի կարող օգտագործվել որպես ապացույց: Մանավանդ որ տեքստն առանձնապես ինչ-որ բան չի ներկայացնում իրենից: Սա այն մեկի դեպքը չէ, որ գաղտնալսել էին, հետո ասում էին, թե բրիտանական լրտես է: Այստեղ պարզապես քաղաքական թեմայով խոսակցություն է, որը մեկին կարող է դուր գալ, մյուսին` ոչ: Նշանակում է` արվել է հասարակական մթնոլորտ ստեղծելու համար: Բայց մեր երկրում իշխանության ու որոշ ընդդիմադիր ուժերի ջանքերով հասարակական, քաղաքական մթնոլորտն այնպես է ապականված, որ մի խոսք ավելի, մի խոսք պակաս` ոչ մի բան չի փոխվի:

-Տեսակետ կա, որ այսպիսով վերադառնում են «հին ու բարի ժամանակները», երբ ԿԳԲ-ն ամենուր էր, հետեւում ու գաղտնալսում էր ամենքին:

-Իսկ ե՞րբ էինք դուրս եկել «սովետական հին ու բարի ժամանակներից», որ հիմա այդպես եք ասում: