Հարավային Կորեայում քաղաքական սկանդալի պատճառ են դարձել «բարի օր» և «բարի գիշեր» արտահայտությունները

Հարավային Կորեայում քաղաքական սկանդալի պատճառ են դարձել «բարի օր» և «բարի գիշեր» արտահայտությունները:  Այս մասին տեղեկացնում է The Korea Times-ը`հավելելով, որ երկրի արտգործնախարարը ստիպված է եղել ներողություն խնդրել խորհրդարանի առջև:

Պարբերականը նշում է, որ Հարավային Կորեայի նախագահ Մուն Չժե Ինը մարտի սկզբին այցելել էր Մալայզիա:  Վարչապետ Մահաթհիր Մոհամադին նա ողջունել էր «selamat sore» արտահայտությամբ: Այս բառերն ավելի հաճախ օգտագործվում են Ինդոնեզիայում: Պետք է նշել, որ հարևան երկրների լեզուներն այնքան նման են, որ, որպես կանոն, դրանք հասկանալի են երկու ժողովուրդներին:

Մուն Չժե Ինի արտահայտությունը ստիպել էր Մալայզիայի վարչապետին ժպտալ, մինչդեռ նախարարները փռթկացել էին: Պարզվել է, որ Հարավային Կորեայի նախագահը «բարի օր» ասելու փոխարեն «բարի գիշեր» արտահայտությամբ էր ողջունել: Առաջին հայացքից սա մանրուք է թվում, բայց Հարավային Կորեայում մալայզիական լեզվի չիմացությունը «դիվանագիտական աղետ» են որակել:

The Korea Times-ը դատապարտել է նախագահի թիմին «անիրազեկության» համար: «Ընդունող կողմի բողոքի բացակայությունը  չի արդարացնում անհավանական անփութությունը: Սա միջադեպերի շարքից մեկն էր, որը ցուցադրում է նախագահի աշխատակազմում`Կապույտ տանը,  պրոֆեսիոնալիզմի և էթիկայի լուրջ բացակայությունը»,- գրում է թերթը:

Միջադեպից հետո երկրի արտգործնախարար Կանգ Կյոնգվան ներողություն է խնդրել խորհրդարանից՝ ընդունելով` իր նախարարությունը լուրջ սխալ է թույլ տվել:

Այնուամենայնիվ, Մալայզիայում դեպքը ոչ թե վիրավորական, այլ զվարճալի են համարել: