ՀՀՇ և ՕԵԿ համագումարները` աշխարհի վերջից մեկ օր հետո

Ներքաղաքական հայտարարությունների ամենաթեժ օրը լինելու է դեկտեմբերի 22-ը: «Հրապարակ»-ը գրում է, որ այդ օրվա վրա քաղաքական ուժերի կենտրոնացման «պատճառը» թերևս դեկտեմբերի 21-ին սպասվող աշխարհի վերջն է: Եթե այն «չլինի», 22-ին իրենք կարող են կրկին զբաղվել քաղաքականությամբ: Այդ օրը տեղի է ունենալու ՀՀՇ համագումարը՝ Մելիք Ադամյանի վրա գտնվող կառավարության նիստերի դահլիճում: Դեռևս պարզ չէ, թե որտեղից է հնչելու Րաֆֆի Հովհաննիսյանի սպասված հայտարարությունը:

Ինչպես թերթին տեղեկացրին ՕԵԿ-ից, նաև իրենց համագումարն է այդ օրը տեղի ունենալու՝ Մարզահամերգային համալիրում: Ի դեպ, ՕԵԿ համագումարին հրավիրվել են ավելի շատ պատվիրակներ, քան ՀՀԿ համագումարին՝ մոտ 2 հազար 400: Ըստ երևույթին, ՕԵԿ-ն էլի դահլիճը կլցնի այստեղից-այնտեղից բերված ուսանողներով ու ՀՀԿ-ից մերժված անձանցով: Քաղաքական ուժերից ՕԵԿ համագումարին ներկա կլինի միայն ՀՀԿ-ն, քանի որ իրենք հայտարարել են ու կրկին հայտարարելու են, որ պաշտպանում են ՀՀԿ թեկնածուին: