Էրդողանը երկրաշարժից փրկվածներին սադրիչներ է անվանել

Ո՞վ է պատասխան տալու 22 մարդու մահվան համար. հարցնում են թուրքական ԶԼՄ-ները եւ ընդդիմությունը Արեւմտահայաստանի Վան նահանգում երկու օր առաջ տեղի ունեցած նոր երկրաշարժից հետո:

Նրանց կարծիքով` այդ զոհերը կարող էին չլինել, եթե անհրաժեշտ միջոցառումներ ձեռնարկվեին: Ավելի քան 600 մարդու կյանք խլած` հոկտեմբերի 23-ի ավերիչ երկրաշարժից 17 օր անց մարդկանց թույլատրել են վերադառնալ իրենց տները, թեեւ փլուզման վտանգը մեծ էր:

Իսկ իշխանությունների անգործության դեմ բողոքողներին Թուրքիայի վարչապետ Էրդողանը սադրիչներ է անվանել: «Նրանց չի կարելի անվանել երկրաշարժից փրկվածներ: Նրանք սադրիչներ են, որոնք փորձում են սաբոտաժի ենթարկել փրկարարական ընթացիկ աշխատանքները»,- ըստ Euronews-ի` ասել է նա:

Վերջին տեղեկություններով` զոհվածների թիվն արդեն 30 է: Ըստ CNN-Turk-ի` որոնողափորկարարական աշխատանքներն այսօր առավոտյան դադարեցվել են: